Рөстәм Миңнеханов тормышта уңыш китергән киңәш турында сорауга җавап бирде
Татарстан Рәисе Рөстәм Миңнеханов «Мәскәү – Татарстан күпере» форумында яшьләр белән аралашты. Ул залда утыручыларга теләкләрен җиткерде, аларны һәрвакытта да яхшыга өметләнергә чакырды, шулай ук сорауларга җавап бирде.
«Өметегезне өзмәгез, алга барырга кирәк, барысы да яхшы булачак. Махсус хәрби операция алдында торган бурычларны һәм барлык мәсьәләләрне дә хәл итәчәкбез, илебез моннан авыррак сынауларны да җиңеп чыкты. Тыныч булыгыз, борчылмагыз, һәркем үз эшен башкарырга тиеш һәм барысы да әйбәт булачак», - диде Миңнеханов.
Шуннан соң залдан сорау яңгырады: Татарстан Рәисеннән «Нинди киңәш тормышыгызда уңыш китерде?» дип сорадылар.
«Уңышлы өйләнү. Яхшы гаилә кордым. Бу да мөһим, бик», - дип шаяртты ул, шуннан соң залда алкышлар һәм көлгән тавышлар яңгырады.
Искәртеп узабыз, бүген Россия башкаласында VIII «Мәскәү – Татарстан күпере» Мәскәү яшьләр форумы башланды. Аны Татарстанның Россиядәге Тулы вәкаләтле вәкиллеге оештыра.
Миңнехановтан тыш, чарада РФ Хөкүмәте рәисе урынбасары Марат Хөснуллин, РФ төзелеш һәм торак-коммуналь хуҗалык министры Ирек Фәйзуллин, татар блогерлары һәм эшкуарлары да катнаша.
Рөстәм Миңнехановның РФ Хөкүмәте каршындагы Финанс университетының мактаулы докторы исеменә лаек булуы хакында элегрәк хәбәр ителгән иде.