«Үлемсез полк» өчен ветеранның фотосын Күп функцияле үзәкләрдә бушлай бастырып була
Татарстанда күп функцияле үзәк офисларында «Үлемсез полк» акциясе өчен ветераннарның фотосын бушлай кәгазьгә бастырып була. Гаилә альбомындагы фотоны да, электрон форматтагысын да алып килергә мөмкин. Күп функцияле үзәк хезмәткәрләре, фотоны сканердан чыгартып, А4 форматындагы кысага урнаштырып бирә.
Төсле фото ясатырга теләүчеләргә иртәрәк мөрәҗәгать итәргә кирәк, ә аклы-каралы фотоны шунда ук бастырып бирәләр. Бу хакта «Минем документлар» сайты хәбәр итә.
Әлеге хезмәт техник мөмкинлекләргә бәйле рәвештә республикадагы барлык офисларда түгел, ә шуларның 61ендә генә күрсәтелә. Әзер фотоны заказ биргән урынга биш эш көне эчендә китереп бирәләр, дип искәртте Татарстанның күп функцияле үзәге директоры Ленара Мозаффарова.
Фотоны 6 майга кадәр ясатырга мөмкин, чөнки «Минем документлар» офислары 7, 8, 9 майда эшләмәячәк.
Искәртеп узабыз, Казан хакимиятендә Бөек Ватан сугышында Җиңүнең 78 еллыгын бәйрәм итүгә багышланган чараларны әзерләү һәм үткәрү планын расладылар. «Үлемсез полк» акциясе һәр елдагыча 9 Майда узачак.