Миңнеханов мәдәният тармагында эшләүче 32 кешегә Татарстан дәүләт бүләкләрен тапшырды
Бүген Казан Кремлендә Татарстан Рәисе Рөстәм Миңнеханов мәдәният тармагындагы күренекле хезмәткәрләргә республика дәүләт бүләкләре тапшырды. Татарстанның 32 кешесе дәүләт бүләкләренә лаек булды.
«Мәдәният – җәмгыятьнең иң мөһим нигезләренең берсе. Ул безнең бердәмлекне ныгытуга, милләтара тынычлыкны һәм татулыкны саклауга хезмәт итә, яшь буынны тәрбияләүгә уникаль өлеш кертә», – диде республика җитәкчесе.
Рөстәм Миңнеханов мәдәният хезмәткәрләрен якынлашып килүче һөнәри бәйрәмнәре белән котлады һәм һөнәрләрен яратулары һәм эшкә тугры булулары өчен рәхмәт белдерде. Ул шулай ук Татарстанда 2023 елның Милли мәдәниятләр һәм гореф-гадәтләр елы дип игълан ителүен искәртте.
Ул рус классигы Александр Пушкинның тууына 225 ел тулуны һәм татар мәгърифәтчесе Каюм Насыйри тууына 200 ел тулуны бәйрәм итүгә әзерлек турында карар имзалавын да билгеләп үтте. Республика җитәкчесе очрашуда катнашучыларны әлеге чараларга әзерлек эшендә өлеш кертергә чакырды.
Моннан тыш, Миңнеханов искәрткәнчә, май аенда «Россия — Ислам дөньясы: KazanForum-2023» XIV халыкара икътисади форумы узачак. Аның фикеренчә, мондый масштаблы чараны үткәрү – «безнең үзенчәлегебезне, мәдәниятебезне, тарихыбызны һәм традицияләребезне күрсәтү өчен искиткеч мөмкинлек».
Республикада мәдәният тармагына ярдәм итүнең масштаблы чаралары гамәлдә, «Мәдәният» милли проекты кысаларында актив эш алып барыла. Соңгы ике елда илкүләм проектны гамәлгә ашыруга 2 миллиард сумнан артык акча җәлеп ителде, дип өстәде Татарстан Рәисе.
Республика программасы буенча авыл мәдәният йортлары, балалар сәнгать мәктәпләре төзекләндерелә, театрлар һәм авыл клублары төзелә, дип дәвам итте ул. «Бу учреждениеләрдә яңача тормыш булдыру, халыкны актив җәлеп итү – иң беренче чиратта тармак хезмәткәрләренең бурычы», – дип искәртте республика җитәкчесе.
Татарстанның дәүләт бүләкләрен тапшыру тантанасы Татарстан Республикасы Рәисе каршындагы Мәдәният һәм сәнгать советы утырышыннан соң ук узды. Бу уңайдан Миңнеханов утырышта кәсепчелекне үстерү, аларны төбәктән читтә күтәрү турында сөйләшү булуын әйтте. «Бу юнәлеш буенча чаралар планын әзерлиячәкбез. Һөнәрләрне үстерү буенча дәүләт ярдәме чараларын активрак алга этәрергә кирәк», – диде ул.
Дәүләт бүләкләре арасында «Фидакарь хезмәт өчен» медале, «ТАССРның 100 еллыгы» медале, ТР Рәисенең Рәхмәте тапшырылды, шулай ук «ТР атказанган артисты» һәм «ТР атказанган мәдәният хезмәткәре» мактаулы исемнәре бирелде.