Пенза өлкәсенең Кикин авылында «Сәләтле балалар» форумы булды

Пенза өлкәсенең Каменка районы Кикин авылында «Сәләтле балалар» XVIII форумы булды. Форумда Сура крае мәгариф оешмалары һәм күрше төбәкләрдән 400гә якын кеше катнашты. Бу хакта Пенза өлкәсе татар милли-мәдәни мохтариятенең «Вконтакте» социаль челтәрендәге төркемендә хәбәр ителә.

Тантаналы чарада Пенза өлкәсе мәгариф министры Алексей Комаров, Пенза өлкәсе Төбәк үсеше институты ректоры Геннадий Белорыбкин, Каменка районы хакимияте башлыгы урынбасары Ольга Логачева, «Пенза өлкәсенең татар милли-мәдәни мохтәрияте» төбәк иҗтимагый оешмасы рәисенең урынбасары Гөлназ Самочкина, «Марафон» иҗтимагый спорт оешмасы рәисе, «Пенза өлкәсе татар милли-мәдәни мохтәрияте» төбәк иҗтимагый оешмасы башкарма комитеты әгъзасы Фәрит Акъегетов һәм башкалар катнашты.

Ел саен форумда «Пенза өлкәсенең татар милли-мәдәни мохтәрияте» төбәк иҗтимагый оешмасы катнаша. «Пенза өлкәсенең татар милли-мәдәни мохтарияте» төбәк иҗтимагый оешмасы рәисенең урынбасары Гөлназ Самочкина, Пачелма районы Татар мәдәнияте җәмгыяте рәисе Марат Тенишев һәм Пенза өлкәсенең Төбәк үсеше институтының гуманитар белем бирү үзәгенең өлкән методисты Хәдичә Мәһдиева «Татар телендә әдәби әсәр, туган якны өйрәнү», «Туган якны өйрәнү», «Әдәби әсәр» номинацияләрендә жюрига чакырылды

Форум 16 номинациядә узды. Алар - «Яшь журналист», «Яшь әкиятче», «Туган якны өйрәнү», «Туризм һәм спорт», «Халык иҗаты», «Вокал», «Бию», «Музыка уен коралларында уйнау», «Яшь уйлап табучы», «Экология» һәм «Биология», «Медицина, сәнәгать, авыл хуҗалыгы, мәгариф, туризм, спорт, әдәбиятта мәгълүмати технологияләр һәм эшмәкәрлек» һ.б.

Форум эше тәмамлангач, анда катнашучылар дипломнар һәм медальләр, шулай ук «Пенза өлкәсенең татар милли-мәдәни мохтарияте» төбәк иҗтимагый оешмасының махсус призлары белән бүләкләнде. Форумны оештыруда һәм үткәрүдә катнашкан педагогларга Бөтендөнья татар конгрессыннан Рәхмәт хатлары тапшырылды, диелә хәбәрдә.