Чирмешән районының Түбән Чегодай егетләре авылдашларына бүләкләр кайтарган
(Чирмешән, декабрь, «Татар-информ», «Безнең Чирмешән» , Марат Гомәров). Чирмешән районының Түбән Чегодай авылында Кыш Бабай балаларга һәм өлкән яшьтәге әби-бабайларга тәмле ризык-күчтәнәчләр таратты. Анда мандарин, хуш исле чәй, кәнфит салынган. Бу турыда район басмасы хәбәр итә. 14 яшькә кадәрге утыз балага һәм 85 яшьне узган өлкәннәргә, авыррак хәлдәге инвалидларга (15 кеше) әлеге күчтәнәчләрне өләшкәннәр. «Тәм-томнарга акчаны Чирмешәндә яшәүче авылдашларыбыз — Фәрхать Мортазин, Равил Галләмов, Фәрит Гыйниятуллин, Мәсхүт Хөсәенов җибәргән, кибетчебез Әнисә Гатина исә пакетлар ясап бирде. Игелекле авылдашларыбызга бик зур рәхмәт», — ди Түбән Чегодай авылы мәдәният йорты директоры Гүзәл Хәмидуллина.