Әлмәт студентлары WorldSkills чемпионаты җиңүчеләре булды
(Әлмәт, 12 декабрь, «Татар-информ», « Әлмәт таңнары »). Әлмәтнең «Татарстанның киләчәге көллияте» белем бирү проекты студентлары «Яшь профессионаллар» WorldSkills региональ чемпионаты җиңүчеләре һәм призерлары булганлыгын хәбәр итте район башлыгы Тимур Нагуманов. Бу турыда район басмасы яза. 3 курс студентлары Илназ Хәнипов һәм Рөстәм Вәлиәхмәтов «Сәнәгать механикасы һәм монтажы» һәм «Электромонтаж» компетенцияләрендә алтын медаль яуладылар. 2 курс укучылары Айнур Гәрәев һәм Илья Мухин «Мехатроника» компетенциясендә көмеш медаль алдылар. Константин Антонюк, Виталий Бабулин һәм Владислав Волков «Производствода команда эше» компетенциясе бронза призерлары булды. Төбәк чемпионаты Казанда һәм Чаллыда узды. Аның җиңүчеләре Татарстан җыелма командасы составында 2021 елның җәендә Уфада «Яшь профессионаллар» IX Милли чемпионатының ярымфиналында көч сынашачак.