«Бердәм Россия» эшсезлектән иминиятләштерүгә кире кайтырга тәкъдим итте
(Казан, 31 август, «Татар-информ»). «Бердәм Россия» депутатлары эшсезлектән иминиятләштерү практикасын яңартырга тәкъдим итте. Әлеге механизм Covid-19 пандемиясе аркасында эш урыннарын югалткан хезмәткәрләргә ярдәм итәргә мөмкинлек бирер иде. Инициатива партиянең Татарстан активистлары тарафыннан да хупланды. Закон буенча хезмәткәрләрнең эштән азат ителүе эш бирүченең чыгымнары артуга китерә, шуңа күрә кайбер җитәкчеләр хезмәткәрләрне үз теләкләре белән эштән китәргә мәҗбүр итә. Дәүләт Думасында «Бердәм Россия» фракциясе җитәкчесенең беренче урынбасары Андрей Исаев сүзләренчә, эшсезлектән иминиятләштерү эш бирүчеләрнең дә мәнфәгатьләрен якларга мөмкинлек бирәчәк, чөнки эштән киткәндә мәҗбүри түләүләргә чыгымнарны иминият компаниясе каплаячак. Инициативаны Татарстаннан Дәүләт Думасы депутаты Ольга Павлова хуплады. «Партия тәкъдим иткән яңа механизмнарны гамәлгә кертү халыкны эш белән тәэмин итү үзәкләре белән хезмәттәшлек итү процессларын, аларны потенциаль эшкә урнаштыру процессларын җиңеләйтәчәк һәм шактый тизләтәчәк», — диде Павлова.