Айдар Метшинның улы Кырымда коронавирус инфекциясе йоктырган
(Казан, 9 август, «Татар-информ», Александра Комарова). Түбән Кама мэры Айдар Метшинның улы Морат Метшин Кырымнан коронавирус инфекциясе йоктырып кайткан. Instagram социаль челтәрендәге үз сәхифәсендә ул шул хакта хәбәр итә. Морат Метшин әйтүенчә, 2 августта, Кырымда ял иткән чагында, ул үзендә хәлсезлек сизгән, Казанга кайткач, 6 августта, коронавируска тест тапшырган. Анализы уңай икәнлеген белгәч, карантинга киткән һәм дарулар кабул итә башлаган. «Кәефкә килгәндә, үзгәрешләр бар. Үземдә хәлсезлек сизәм, хәтта гап-гади көнкүреш әйберләре белән шөгыльләнгән вакытта да хәл бетә. Тамак төбе кымырҗый, йөткертә, бераз борын тыгылган, тәм һәм исне сизмим», - дип искәртә ул.
Морат Метшин Кырымда коронавирус белән бәйле чикләүләрнең бөтенләй диярлек үтәлмәвен әйтте.