Ульяновскида Габдулла Шамуковның иҗат юлына багышланган китап басылып чыкты
(Казан, 10 гыйнвар, «Татар-информ»). Күптән түгел Ульяновск өлкәсендә Чардаклы районы Әсән авылында туып үскән СССРның, РСФСРның, ТАССРның халык артисты hәм Башкортстанның атказанган артисты Габдулла Шамуковның тормыш hәм иҗат юлына багышланган «Yзе. Һәм үзе турында» дип аталган китап басылып чыкты. Бу турыда «Өмет» газетасы хәбәр итә.
Зәвыклы итеп бизәлгән 300 битле җыентык татар сәхнәсе йолдызының 110 еллык юбилее уңаеннан нәшер ителде.
Әлеге китапта каләм остасының төрле елларда татар матбугатында дөнья күргән мәкаләләре hәм тәрҗемәләре урын алган. Ул А.С.Пушкин әсәрләрен тәрҗемә итәргә аеруча яраткан икән.
Җыентыкта шулай ук Россиянең hәм Татарстанның халык артистлары Әзhәр Шакиров белән Наилә Гәрәеваның, Габдулла Рухулла улының чордашлары — Татарстанның халык артистлары Луара Шакирҗан, Хәлим Җәләлов, Фирдәвес Хәйруллинаның hәм күпсанлы шәкертләренең күңел хатирәләре, җылы истәлекләре белән танышырга мөмкин.
«Yзе. Һәм үзе турында» дип исемләнгән җыентык кыска гына вакыт эчендә әзерләнеп, Ульяновск өлкә Хөкүмәте, өлкә cәнгать hәм мәдәни сәясәт министрылыгының грант акчасына басылып чыкты. Китапны әзерләү эшләренә өлкә автономиясе рәисе Рамис Сафин җитәкчелек итте. Ул үзенең кереш сүзендә бу хезмәтне башкаруда ярдәм күрсәтүчеләргә рәхмәтләрен юллый.