Ульяновскиның тарихи мәчетендә «Ачык ишекләр көне» үткәрелде
(Казан, 10 гыйнвар, «Татар-информ»). Соңгы вакытта Ульяновск өлкәсе мәчетләрендә «Ачык ишекләр көне» уздыру матур гадәткә кереп бара. Яңа елның беренче көннәрендә чираттагы «Ачык ишекләр көне» Ульяновск шәһәренең 1915 елда төзелгән тарихи мәчетендә үтте. Бу турыда Бөтендөнья татар конгрессы хәбәр итә.
Мәчеттә «Ачык ишекләр көне»н уздыруны шәһәребезнең тарихи мәчет имамы Рәсүл хәзрәт башлап җибәрә. Төркиядә укып кайткан Рәсүлне 1998 елда туган шәһәрендә имам итеп билгелиләр, яшь егет соңрак Уфада Россия ислам университетын тәмамлый. Ә узган ел ул Россия халык хуҗалыгы академиясе дипломына да ия була.
Мондый чаралар яшьләрне мәчетләргә тарту һәм аларга традицион Ислам дине турында дөрес мәгълүмат бирү максатыннан үткәрелә.
Әлбәттә, мәчетләребезнең мондый чараларның күп милләтле шәһәрдә оештыруы бүгенге көннең уңышлы проектларның берсе. Анда балаларның һәм яшүсмерләрнең күпләп катнашуы аеруча да отышлы.
Халык саны буенча Ульяновск өлкәсендә татарлар икенче урында тора. Аларның саны бүген 150 меңнән артып китә. Өлкә үзәгендә генә дә 50 мең татар кешесе гомер итә. Өлкә авылларында гына түгел, шәһәрләрдә дә мәчетләр саны ел саен артып бара. Төрле дин һәм милләт вәкилләре бер гаилә булып дустанә мөнәсәбәттә гомер итәләр.
«Ачык ишекләр көне»ндә мәчетнең бер генә почмагы да буш калмаган. Һәр урында балалар өчен кызыклы остаханәләр, һәртөрле викторина, бәйгеләр оештырылган.
Мөфтияттә әйтүләренә караганда, мондый чара киләчәктә шәһәрнең башка мәчетләрендә дә уздырылачак. Чөнки бу заман таләбе.