Akimiyet, leyhalarnıñ maliye etilüvini Qırımtatar Milliy Meclisinen muzakere etecek – nazir

Ukraina medeniyet nazirligi, qırımtatar halqınıñ lideri Mustafa Cemilev ve Qırımtatar Milliy Meclisiniñ vekillerinen leyhalarnıñ devlet tarafından maliye etilüvinde eñ müim yönelişlernen bağlı mesleatlar keçirecek. 

Bu aqta Ukraina medeniyet, gençlik ve sport naziri Volodımır Borodânskıy Telegram-kanalında yazdı.

Onıñ aytqanına köre, Ukrainanıñ tamır halqı olaraq qırımtatar halqına, hususan qırımtatar televizion yayınlarına qoltutmaq devlet içün eñ müim prioritetlerden biri ola. 

«Qayd etmemiz kerek ki, 2020 senesi devlet büceti belgilegen qırımtatar televizion yayınları içün devlet desteginiñ miqdarı 50 million ğrıvnâ ola. Ukraina medeniyet fondu çerçivesinde qırımtatar medeniyetine qoltutacaq ve inkişaf ettirecek programmanıñ açılması planlaştırıla. Qırımtatar tilini ögrenmek içün online platformanıñ açılışı da azırlanıla», – dep qayd etti nazir. 

Bundan ğayrı, Medeniyet, gençlik ve sport nazirligi «Qırım evi» Devlet müessisesiniñ faaliyetine qoltutmağa devam ete, dep bildirdi memur.

Volodımır Borodânskıy, Rusiye işğal etken Qırım ve Kyiv kontrol etmegen Donbasnıñ qısmı içün yayın yapılması prioritet ola.

UATV halqara yayın ukrain telekanalınıñ ingliz ve qırımtatar tilli muarririyetleri işini toqtattı. Telekanal, Ukraina akimiyeti halqara yayınnı toqtatmağa qarar aldı, dep hatırlattı. 

Ukraina memurları, 2020 senesi fevral ayında UATV esasında Ukraina akimiyeti kontrol etmegen topraqlar içün rus tilli telekanal açılacaq, dep ilân etken edi.