Jurnalist Taras İbragimovnıñ Qırımğa kirişini yasaqlamaq qararı qanunsız ola ve lâğu etilecek – advokat

Qırım.Aqiqat muarririyetinen çalışqan ukrainalı jurnalist Taras İbragimovnıñ işğal etilgen Qırımğa kirişini yasaqlamaq qararı qanunsız ola ve lâğu etilecek. Bu aqta advokat Aleksey Ladin Facebookta haber etti.

«Bugün jurnalist Taras İbragimovnıñ Rusiye Federatsiyasına kirişi 31.05.2054 tarihine qadar lâğu etildi. Habernameni imzalağan vekâletli kişi – S. V. Çeşuy. Çeşuy kim ola ve habernameni imzalaması mümkün edimi – belli degil. Amma Çeşuy adından Rusiye, İbragimovnıñ 2054 senesine qadar Rusiyege kirmege qanuniy imkânı olmaycaq, dep bildirdi. Bunıñ içün Rusiye Fderatsiyasınıñ vekili olğan Çeşuyğa resmiy şekilde bildirem ki, qararıñız qanunsız ola ve lâğu etilecek», – dep yazdı o.

Qırım ve Herson vilâyetiniñ memuriy sıñırında İbragimovğa berilgen qararda Rusiyege ve Qırımğa kirişi 2054 senesi mayısnıñ soñuna qadar yasaqlana, dep aytıla. Jurnalistniñ aytqanına köre, er şey nezaketli oldı, amma yasaqnıñ sebepleri qararda yoq, olarnı ağzaviy şekilde de bildirmediler.

«Bunıñ sebebi jurnalist faaliyetim ve Qırım ve Rusiyede qırımtatarlarnıñ mahkemelerini faal sürette aydınlatqan neşirlerdeki işim ola, dep tüşünem», – dep añlattı İbragimov. 

Onıñ bildirgenine köre, onıñ parmaq izleri alındı, foto yapıldı.

Rusiye FSBsi sıñır hızmeti hadimleriniñ advokatnıñ aytqanlarına izaatları daa yoq.

2019 senesi fevralniñ 18-nde Qırım.Aqiqatnen işbirligi yapqan fotoressam Alina Smutkonıñ Rusiye işğal etken Qırımğa kirişi 2028 senesine qadar yasaqlandı. Smutko, yasaqnıñ sebebi onıñ zenaat işi oldı, dep bildirdi. Alina Smutkonıñ fotoresimi Radio Free Europe/Radio Liberty Culture & Traditions umumşirket fotoresimler yarışınıñ üç ğalebe işinden biri oldı.

2018 senesi noyabr ayında Rusiye FSBsi Qırım.Aqiqatnen çalışqan ukrainalı jurnalist Alena Savçuknıñ Qırımğa ve qomşu Rusiyege kirişini 2028 senesine qadaryasaqladı. Onıñ aytqanına köre, kirişi Rusiyege kiriş ve çıqış tertibine dair Federal qanunnıñ 27-nci maddesiniñ 1-inci qısmına köre («Devletniñ mudafaası ya da telükesizligi, ya da cemaat nizamı, ya da eali sağlığını qorumaq maqsadınen») yasaq etildi.

2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».