AQŞ OSCE oturışında Rusiye ve Qırımda tutulğan ukrain siyasiy mabüslerni azat etmege talap etti
AQŞ elçisi James Gilmore yanvarniñ 16-sında Venada OSCEde Daimiy Şuranıñ oturışında Rusiye ve Qırımda tutulğan ukrain siyasiy mabüslerni azat etmege talap etti.
Bunıñ aqqında haber OSCEde AQŞ missiyasınıñ saytında yerleşken.
"Rusiye ve Ukraina şarqında o idare etken şahıslarnıñ tarafından tutulğan daa bir qaç yüz ukrain bar, bundan ğayrı Qırımda ve Rusiyede daa çoq ukrain siyasiy mabüs mevcuttır. Biz olarnı acele sürette azat etmege çağırtamız", - dedi öz nutqunda Gilmor.
O, sabıq siyasiy mabüslerniñ işkencelerine dair şeadetnameleri olğan BMT missiyasınıñ insan aqları ile bağlı esabatını añdı.
"Biz, Rusiyede qalğan onlarca ukrain siyasiy mabüsler işkencege oğratılacaqlarından saqınamız. Biz olarnı azat etip, evlerine qaytarmağa Rusiyeni çağırtamız", - qayd etti Gilmor.
AQŞ elçisi, eki yıldan ziyade "DNR"nıñ esirliginde tutulğan Azatlıq Radiosınıñ müellifi Stanuslav Aseyevniñ azat etilmesini selâmladı.
Ukraina Yuqarı Radasınıñ insan aqları vekâletlisi Lüdmila Denisova Rusiyede tutulğan ukrainalı siyasiy mabüslerniñ farqlı sayısını aytqan edi: 113-ten 115-ke qadar, 80-den çoqu – qırımtatarlardır.
Qırımtatar resurs merkeziniñ cedvelinde 86 qırımlı siyasiy mabüs qayd etile. Aynı raqamnı Qırım aq qorçalayıcı gruppası da bere.
Deñişimni beklegen qırımlılarnıñ ekseriyeti – qırımtatarlar, olar bir sıra davalarnıñ, hususan «Hizb ut-Tahrir», «Tebliğ Cemaatı» davalarınıñ (Rusiyede yasaqlanğan, amma Ukrainada yasağı olmağan teşkilâtlar) mabüsleri ola. Aq qorçalayıcılar ve advokatlar bu cinaiy davalarnı diniy sebeplerden taqip dep adlandıra. Bu davalarnıñ mabüsleri – din kütken musulmanlardır.