Rusiye mahkemesi Qırımdaki kütleviy tintüvler neticesinde tutulğan daa üç qırımtatar faaliniñ tevqif müddetini uzattı
Rusiye FSBsi ve prokuraturasınıñ vekilleri qabaatlanğanlar SİZOda tutulmalı, dep israr etti. Olar dava mabüsleri azatlıqta olsa, «tahqiqat ve mahkemeden saqlana, şaatlarnı qorquza, delillerni yoq ete bile» ya da «cemaat telükesizligine zarar ketire bilecek qanunsız faaliyetnen oğraşmağa devam ete bile», dep bildirdi. Qabaat tarafı bunı isbatlaycaq bir delil köstermedi.
İmaye SİZOda tutulmasınen bağlı olmağan er angi sıñırlav tedbiri, hususan yaşağan yerleri boyunca ev apsi berilmesini rica etti.
Qabaatlanğan Şaban Umerov mahkemede çıqışta bulunıp, özüni «bir şey bozmağan, qanunğa riayet etken vatandaş» dep sayğanını bildirdi. O, «yürek, omurğa ve aqciger problemleri olğanını» qayd etti.
Umerov Qırımdan avuştırılmasını, yaşağan yerinden yüzlernen kilometrge uzaqlaştırılğanını sürgünlik dep sayğanını qoştı.
Qabaatlanğan diger kişi Riza İzetov mahkemege Rusiye tahqiqatından saqlanmağa niyeti olmağanını ve ömür arqadaşı loqsahanede yatqanını, yaqın insanları ise Qırımda bulunğanını ayttı.
Mayısnıñ 13-nde Rusiyeniñ Rostov vilâyetindeki Taganrog şeer mahkemesi martnıñ 27-nde Qırımda keçirilgen kütleviy tintüvler neticesinde tutulğan Aqmescitteki ekinci «Hizb ut-Tahrir davasınıñ» dört mabüsiniñ apis müddetini uzattı. Seyran Murtaza, Enver Ametov, Mecit Abdurahmanov ve Rustem Seythalilovavgustnıñ 15-ne qadar SİZOda qalacaqlar.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahta SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.