«Hizb ut-Tahrir davası» boyunca mahküm etilgenniñ anası ve apayı Bağçasaraydaki politsiya bölüginden yiberildi
Bağçasarayda bir kişilik piket keçirgeninden tutulğan Enver Mamutovnıñ ömür arqadaşı Aliye ve anası Zarema politsiya bölüginden yiberildi. Bu aqta Aliye Mamutova Qırım.Aqiqat mühbirine bildirdi.
«Bizni ne maqsadnen tutqanlarını öyle de añlap olamadım. Politsiya hadimine bizge advokatlar kelgenini haber etken soñ bizni aşağı tüşmege rica etip yibergenler. Amma bölükten daa çıqmadıq, bizden keri qaytmamıznı rica ettiler. Politsiya kapitanı Dilâver Suleymanov Rusiye qanunlarınıñ normalarını bozmaycağımızğa dair tenbi bermege istey, dep bildirdi. İmayeci bizni tutmağa aqları yoq dedi, tenbi ise poçtanen yollana bile. Neticede bir qabaatlav olmadı, bölükte bir buçuq saat qaldıq», – dep tarif etti Aliye.
Daa evel haber etilgeni kibi, Bağçasarayda Rusiye politsiyası bir kişilik narazılıq aktsiyasına çıqqan Zarema Mamutovanı ve Enver Mamutovnıñ Facebookta canlı yayında olğan ömür arqadaşı Aliye Mamutovanı tutıp aldı. «Hizb ut-Tahrir davası» boyunca mahküm etilgenniñ anası alğan yazuvlı şiarda «Oğlum terrorist degil. 17 yıl ne içün berildi?» dep yazılğan edi.
Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.