Qırımda apiske alınğan faallerden biri olarnı Rostov-na-Donuğa nasıl alıp ketkenlerini tarif etti
Apiske alınğan qırımtatar faallerinden biri Ruslan Suleymanov onı ve diger faallerni Qırımdan Rostov-na-Donu şeerine nasıl alıp ketkenlerini tarif etti. Bu aqta «Qırım birdemligi» birleşmesi müvekkilini ziyaret etken advokat Lilâ Gemeciniñ malümatına esaslanıp bildirdi.
Suleymanovnıñ aytqanına köre, onı ve tutulğan qırımtatarlarnı Aqmescitten Rostov-na-Donuğa uçaqnen alıp ketkenler.
«Uçaqtaki bütün illüminatorlar qapatılğan edi, uçaqtan er kesni telükeli cinayetçilerni kibi şapkada, qapalı közlernen çıqarğanlar. Ruslan qayda olğanını añlamağan edi, tünevin SİZOda vesiqalar ketirilgen soñ Rostov-na-Donuda olğanını añladı. Ruslan Suleymanov ve apiste olğanlar tuvğanlarına, Ukraina konsulı Taras Malışevskiyge bulunğan yerlerini bildirmege rica etti, amma «olmaz» cevabını aldı», – dep bildire advokat Lilâ Gemeciniñ aytqanlarını faaller.
Onıñ bildirgenine köre, Ruslan Suleymanov 6 ve 1,5 metrelik kamerada daimiy video nezareti altında buluna. Kamerada eki kişi olmaq kerek, amma şimdi bir özü qala.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Martnıñ 27-nde ve 28-nde Aqmescitniñ Kiyev rayon mahkemesi tutulğan bütün faallerni apiske aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.