Advokatlar, Asan Çapuh davasınıñ ayrı baqılmasını mahkemeden rica etecek ola
«Veciye Kaşka davasınıñ» advokatları Asan Çapuhnıñ sağlıq vaziyeti fenalaşqanından sebep davasını ayrı mahkeme esnasına almağa rica etecek ola. İmayecilerniñ bildirgenine köre, bu adım diger mabüsler Bekir Degermenci, Kazim Ametov ve Ruslan Trubaç davalarınıñ sozulması meselesini al etecek, dep bildire Qırım.Aqiqat mühbiri.
«Asan Çapuhnıñ sağlıq vaziyeti fena olğanı içün mahkemeni eki kere başqa künge avuştırğan edik ve davanı baqıp olamayıq, esnas pek sozula, ve diger mabüslerniñ cinaiy davalarınıñ vaqtında ve tam baqılma aqlarını boza. Bundan ğayrı, qalğan üç mabüs ev apsinde degil de, nezaret altında buluna, buña da emiyet berilmeli», – dedi advokat Ayder Azamatov.
Onıñ aytqanına köre, kelecek oturışuvda imaye Çapuhnıñ davasını ayrı baqmağa rica etecek.
«Kelecek mahkeme oturışuvına qadar (yanvarniñ 24-ne planlaştırıla – QA) Asan Çapuhnıñ sağlığı deñişmese, alı ağır olıp qalsa, imaye Çapuhnıñ davasını ayrı baqmağa rica etecek. Mence, mahkeme muracaatımıznı qabul eter, bütün sebepler bar. Bundan ğayrı, devlet qabaatlavı da buña qarşı çıqmaycaqtır. Dava baqılması sozulmamalı, başqa mabüsler zarar köre», – dedi Azamatov.
Rusiye kontrolindeki Aqmescitniñ Kiyey rayon mahkemesi yanvarniñ 9-nda «Veciye Kaşka davasınıñ» oturışuvını yanvarniñ 24-ne avuştırdı, çünki qabaatlanğanlardan biri, qırımtatar faali Asan Çapuh kelip olamadı.
Yanvarniñ 7-ne keçer gecesi Çapuh Aqmescit hastahanelerinden birine acele alındı. Advokat Ayder Azamatov mabüsni Aqmescitniñ 6-ncı hastahanesinde ziyaret etken soñ sağlıq alı bir qarar, dep bildirdi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.