Mustafa Cemilev, yubileyi arfesinde Qırımdaki mahkümlerniñ balalarına yardım etmege çağıra
Qırımtatar halqınıñ lideri, Ukraina prezidentiniñ qırımtatar halqı işlerinden vekâletlisi, Ukraina halq deputatı Mustafa Cemilev 75 yaş yubileyi arfesinde Rusiye ve Qırımda siyasiy sebeplerden tutulğan mahkümlerniñ balalarına yardım etmege çağırdı.
Onıñ aytqanına köre, bugünki künde Qırımda 113 bala apiste yatqan babalarını körmey.
«Dostlarım, semetdeşlerim ve zenaatdaşlarım gizlemege tırışqan alâmetlerge köre, 75 yaşımnı tolduracam… Faqat, sizge bir ricam bar: 75 yaş yubileyim munasebetinen olacaq körüşüvimizni qırımlı siyasiy mabüslerniñ qorantaları içün hususiy bir kün yapayıq», – dep aytıla Cemilevniñ Facebook saifesinde.
«Uydurılğan ve sahte qabaatlar boyunca aman-aman bütün siyasiy mabüsler eñ ağır ceza ala bile. Bizim içün millet mensüpligine baqmadan qırımlı siyasiy mabüslerniñ balaları qırımtatar halqınıñ evlâtları ola. Maña yapılacaq ediyelerge para masraf etmeñiz. Qırımlı siyasiy mabüslerniñ çağına yetmegen balalarına yardım köstermek içün para toplap olsaq, can-yürekten quvanırım. Siyasiy mabüslerniñ balaları içün bayram yapayıq», – dep qayd etti qırımtatar milliy lideri.
Cemilev, «Qırım» Vaqfı» hayriye teşkilâtınıñ esabına para yollap, «Qırımlı siyasiy mabüslerniñ balalarına yardım» dep yazmağa rica etti.
Mustafa Cemilev, qırımtatar halqınıñ aqları oğrunda küreşip, halqınıñ ürmetini ve qırımtatar milliy lideri statusını qazandı.
1966-1983 seneleri devamında o, altı kere apiske alınğan edi. Yedi kere mahküm etilgen Cemilev «sovetler qurumını aqaretlegen fikirleri» içün 15 yıl apiste yattı. 1975-1976 seneleri Omsk apishanesinde 303 kün açlıq narazılığını tuttı. 1986 senesi azatlıqqa çıqtı.
1991 senesinden 2013 senesine qadar Qırımtatar Milliy Meclisiniñ reisi edi. Mustafa Cemilev – III-VII çağırılış Ukraina Yuqarı Radasınıñ halq deputatı. 2014 senesi noyabr ayından berli – VIII çağırılış Ukraina halq deputatıdır.
2014 senesi avgustnıñ 20-nde Ukraina prezidenti Petro Poroşenkonıñ №657/2014 fermanı esasında Ukraina prezidentiniñ qırımtatar halqı işlerinden vekâletlisi olaraq tayin etildi.
Mustafa Cemilev Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.