İlhaqtan soñ qaytqandan köre, Qırımdan köçkenlerniñ sayısı daa ziyade – Kürkçi

Umumen alğanda Rusiye ilhaq etken Qırımdan er yıl 3 biñge yaqın yerli sakin çıqa ve keri qayta. Bu aqta Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi rehberiniñ birinci muavini Yusuf Kürkçiniñ sözlerine bazanaraq «Ukrinform» yazmaqta.


 «Qırımdan bütünley köçip ketken insanlar bar, çıqıp bir daa qaytqan soylârı da bar. Yañlış aytqanlardan olmaq istemem amma, yılda 2-3 biñ insan desek, daa ziyade kerçek raqam sayılır. Mesele şunda ki, Qırımnı terk etkenlerniñ sayısı daa ziyade», – dedi Kürkçi.


Rusiye ükümeti qomşu Rusiyeden ilhaq etilgen Qırımğa bir millionğa yaqın insan köçürip ketirdi dep aytqan edi daa evel Ukraina prezidentiniñ qırımtatar halqınıñ işleri boyunca vekâletlisi, Ukraina halq deputatı Mustafa Cemilev.


Qırım ealisiniñ demografik terkibi Rusiye vatandaşlarını ketirüv yolunen deñiştirlgenini mutehassıslar halqara cinayet mahkemesinde körülecek eñ ciddiy cenk cinayetlerinden biri dep saya.


Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.