Çubarov: Qırımda Rusiye saylavında iştrak etüv seviyesi 42%-ni teşkil etti, olardan 8%-i bülletenlerni bozdı

İlhaq etilgen Qırımda 2018 senesi mart 18-de olıp keçken Rusiye prezidenti saylavında iştirak etüv seviyesi 42%-ni teşkil etti, olardan 8%-i – rey brüv içün bülletenlerni bozdı. Bunı Qırımtatar Milliy Meclisiniñ reisi Refat Çubarov, Rusiye FSBsiniñ malümatına atıfta bulunaraq, özüniñ Facebookında bildirdi.


Çubarov: «Saylav vaqtında Qırımda Rusiye prezidenti Vladimir Putinniñ memuriyetinden vekiller bar edi. Olar Rusiye prezidenti saylavınıñ ketişatını közete ediler. Rey berüv neticelerine dair kerçek malümatnı aks etken beyaz denilgen protokolda 42% seviyesinde iştirak etüv köstergiçi buluna. Olardan 8%-i – keçersiz ve bozulğan bülletenler. Yani insanlarnıñ 8%-i saylavğa barmamaqtan qorqtı, lâkin olar bülletenlerni bozdılar. Böylelikle, ideologik ceetten saylavğa doğrultılğanlarnıñ sayısı yalıñız 34% olıp çıqa», – dedi.




Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.


Ukraina Yuqarı Radası mart 22-de ilhaq etilgen Qırım territoriyasında Rusiye prezidenti saylavınıñ tanılmaması aqqında qarar içün rey berdi.


Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.