Sobçak Putinden Sentsov ve Kolçenkonı af etmesini rica etti

2018 senesi saylâvlarında Rusiye prezidentligine namzet televizion alıp barıcısı Kseniya Sobçak Vladimir Putinnen keçirgen körüşüvinde oña amnistiya ya da af etilmesi talabınen siyasiy mabüsler cedvelini taqdim etti. Cedvelde şu cumleden ukrain rejissörı Oleg Sentsov ve qırımlı faal Oleksandr Kolçenko da bar. Bu aqtaki malümatnı saylâvlarda Sobçaknıñ vekâli olğan Marina Litvinoviç özüniñ Facebook saifesinde yerleştirgen.




Rusiyede tutulğan ukrain siyasiy mabüsi Oleg Sentsovnıñ sağlığı ketken sayın fenalaşa, dep bildire martnıñ 16-nda Sentsovnıñ qız qardaşı Natalya Kaplan. Onıñ sözlerine köre, Kaplan Oleg Sentsovtan onıñ tüşleri ufanıp, saçları tökülip başlağanı aqqında yazılğan mektüp alğan eken.


Bir kün evel Oleksandr Kolçenko 10 kün Rusiyeniñ Çelâbinsk hastahanesinde keçirip, nevbetten tış nezaret keçkeni aqqında haber etilgen edi.


Oleg Sentsov ile Oleksandr Kolçenko 2014 senesi mayıs ayında Qırımda Rusiye mahsus hızmet hadimleri tarafından yarımadada teraktlar teşkil etüvde qabaatlanaraq tutılğan ediler. 2015 senesi avgust ayında Rusiyeniñ Şimaliy-Kavkaz okrugınıñ arbiy mahkemesi, Oleg Sentsovnı Qırımdaterroristik faaliyet köstergeninde qabaatlap, 20 yılğa şiddetli rejim apsine mahküm etken edi. Oleksandr Kolçenko 10 yıllık koloniya apsine mahküm etildi. Ekisi de öz qabaatını red eteler.


«Memorial» uquqqorçalayıcı teşkilâtı Sentsov ve Kolçenkonı siyasiy mabuslar cedveline kirsetti.