Siemensniñ «qızı», gaz turbinaları boyunca davasınıñ Rusiye mahkemesi tarafından red etilgenine istinaf etti

Moskva Arbitraj mahkemesi, «Gaz turbinalarınıñ Siemens tehnologiyaları» şirketiniñ istinaf şikâyetini, baqıp çıqmaq içün qabul etti. Mezkür şirket bu şikâyetni, Qırımğa gaz turbinalarını teslim etüv aqqında muqavelelerni keçersiz tanılmaq içün «Rosteh» şirketi strukturalarına qarşı açacaq olğan davasınıñ red etilmesi munasebetinen berdi. Munasip malümat arbitraj işleriniñ kartotekasında yerleştirirldi.


Kartotekağa köre, şikâyet mahkemege fevral 16-da teslim etildi.


2018 senesiniñ yanvarinde Moskvadaki mahkeme «Gaz turbinalarınıñ Siemens tehnologiyaları»nıñ «Rosteh» şirketi strukturalarına qarşı davasını red etti.


Almaniyanıñ Siemens şirketi ve onıñ iştiraki ile Rusiyede meydanğa ketirilgen «Gaz turbinalarınıñ Siemens tehnologiyaları» şirketi mahkemelerde «Rosteh»niñ şubeleri olağan aynı «Tehnopromeksport» adlı (OAO «Tehnopromeksport» ve OOO «Tehnopromeksport») eki şirket ile Rusiye tarafından ilhaq etilgen Qırımğa alıp barıp teslim etilgen Almaniya şirketiniñ dört gaz turbinası boyunca mahkemeleşeler.


Siemens şirketi, kontraktqa muvafıq olaraq olar Rusiyede başqa bir termik elektrostantsiya içün alındı, ve yarımadağa qarşı Avropa Birliginiñ sanktsiyaları qullanğanları içün kontrakt olarnıñ Rusiyeden Qırımğa alıp ketilmesini qatiyen yasaq ete, dep qayd ete.


Rusiye tarafı, eki «Tehnopromeksport»tan kontrakt yapılğan birisi, turbinalarnı alıp, ekincisine satqan soñ, olar endi «ekinci el bazarında alınğan» sayıla ve bu sebepten ilk kontrakttaki sıñırlamalar artıq olarğa alâqalı degil, dep iddia ete.


Dekabrniñ 10-nda Moskvadaki Arbitraj mahkemesi Siemens şirketiniñ Rusiyedeki şube şirketi tarafından «Rosteh» şirketi strukturalarına qarşı açılacaq olğan davanı red etti. Bu dava, daa soñra Qırımğa ketirilip teslim etilgen gaz turbinalarını teslim etüv aqqında muqavelelerniñ keçersiz tanılmaları maqsadınen açılacaq edi. Daa evel, 2017 senesiniñ dekabrinde aynı mahkeme Almaniyadaki Siemens şirketiniñ, añlaşmalar bozulıp yarımadağa ketirilgen dört gaz turbinasını Qırımdan Rusiyege qaytarmaq içün açacaq olğan davasını red etti. Noyabrde ise aynı mahkeme bu turbinalarnıñ tevqif etilmesi içün açılacaq olğan davanı üçünci kere red etti.


Aqyarda ve Aqmescitte qurulğan termik elektrostantsiyalar (TES) içün dört Siemens gaz turbinalarınıñ ketirilmesi aqqında daa 2017 senesi iyül ayınıñ başında belli oldı. Bundan soñ şirket, Rusiye devletine tabi olğan Rusiye şirketlerine donatmalarınıñ ketirip teslim etilmesini toqtatqanını bildirdi. Avropa Birligi ise bu vaqia munasebeti ile Rusiyege qarşı sanktsiyalarını kenişletti.