Volodımır Aryev: «Biz Rusiyeniñ AŞPAğa qaytuv boyunca blitskrigni toqtata bildik»
Ukraina eyeti Rusiyeniñ Avropa Şurasınıñ Parlament assambleyasına (PASE) qaytmasını toqtata bildi. Bunı yanvarniñ 26-nda Ukraina Yuqarı Radasınıñ AŞPAdaki daimiy eyetiniñ yolbaşçısı, assambleya prezidentiniñ yardımcısı Volodımır Aryev Facebooktaki saifesinde bildirdi.
Ukraina Yuqarı Radasınıñ AŞPAdaki daimiy eyetiniñ yolbaşçısı Rusiyeniñ halqara müessiseler ve şu cümleden Avropa Şurasına qaytmaq teşebbüsine «blitskrig» dedi.
Bildirüvde: «Biz Rusiyeniñ AŞPAğa qaytuv boyunca blitskrigni toqtata bildik ve kelecek içün optimizmni arttırğan bir çoq muim müzakereler yapa bildik. Bizim aqiqat, adalet ve insan aqlarınıñ üstünligi oğrunda küreşimiz devam ete. AŞPA-2018 sessiyasında er şey daa ileride», – denile.
Volodımır Aryev Avropa Şurasındaki Ukrainanıñ daimiy temsilciligi eyetine «birdemlikte yapılğan semereli iş» içün teşekkür bildirdi.
Yanvarniñ 26-sında Avropa Şurasınıñ Parlament assambleyası Rusiyeden, AŞPAnıñ ilhaq etilgen Qırım ve Donbassnıñ işğal etilgen territoriyaları boyunca qabul etilgen qararlarını yerine ketirmege talap etti.
Yanvarniñ 23-nde Avropa Şurasınıñ Parlament assambleyası qarar qabul etip, içinde Rusiyeni ilhaq etilgen Qırımda insan aqlarına sayğı köstermege ve sakinleriniñ havfsızlığını temin etmege, Qırımtatar Milliy Meclisiniñ yasağı ve qırımtatarlarnıñ liderlerine kirüv yasağını lâğu etmege, bütün ukrain mabüslerini azat etmege, halqara teşkilâtlarğa Qırımğa kirüvni temin etmege davet etti. Aynı zamanda AŞPA (PASE) Moskvadan ilhaq etilgen Qırımda «ealini köçürüv» siyasetini toqtatmaqnı talap etti.
Ondan ğayrı Qırımtatar Milliy Meclisiniñ reis muavinleri Ahtem Çiygoz ve İlmi Umerov, Rusiyeniñ tekrar halqara muessiselerge ve şu cümleden Avropa Şurasına qaytmaq imkânınıñ berilmesine yol bermemege davet ettiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.