Siemens şirketi Rusiyedeki mahkemeniñ Qırımğa gaz turbinalarınıñ ketirilmesi boyunca çıqarğan qararına şikâyet etti
Rusiyeniñ «İnterfaks» haber agentligi, Siemens şirketiniñ yanvar 16-da Moskvadaki Arbitraj mahkemesiniñ «Rosteh» strukturalarına qarşı iş boyunca çıqarğan qararına şikâyet etkenini bildire.
Kütleviy haber vastasınıñ malümatına köre, apellâtsion şikâyet Moskvanıñ Doquzıncı arbitraj apellâtsion mahkemesine yollandı.
Yanvarniñ 10-nda Moskvadaki Arbitraj mahkemesi Siemensniñ eki «Rosteh» strukturasına qarşı davasını red etti. Davacı, turbinalarını istisal etken «Gaz turbinalarınıñ Siemens tehnologiyaları» sıñırlı mesuliyetli şirketi (OOO) turbinalarnıñ ketirip teslim etilmesine dair «Rosteh» strukturaları ile 2015 senesi martnıñ 10-nda yapqan añlaşmasınıñ qanunsız tanılmasını ve, ondan ğayrı, dört gaz turbina tertibatınıñ qaytarılmasını istey edi.
РDaa evel Moskvadaki Arbitraj mahkemesi Siemensni «Gaz turbinalarınıñ Siemens tehnologiyaları»nıñ Rusiyedeki «Rosteh» şirketiniñ strukturalarına qarşı davasına celp etti. Bu munasebet ile mahkemeniñ oturışuvı yanvarniñ 10-na keçirildi.
Siemens, turbinalarınıñ ketirip teslim etilmesi ve daa soñra Rosteh strukturalarına teslim etilmesine dair añlaşmalarınıñ qanunsız tanılmasını ve ondan ğayrı ketirilip teslim etilgen gaz turbina tertibatlarınıñ qaytarılamsını talap ete edti. «Gaz turbinalarınıñ Siemens tehnologiyaları» şirketiniñ Rosteh işhanelerine qarşı mahkeme davasındaki talapları da aynı.
Daa evel Siemens ve onıñ «qızı»na qarşı OAO ve OOO «Tehnopromeksport» (Rostehniñ strukturaları – QA) qarşı dava açtılar. Rostehniñ yolbaşçısı Sergey Çemezov, «Tehnopromeksport» ve Almaniyanıñ Siemensi arasındaki Qırımğa turbinalarnı ketirip teslim etüv boyunca davası yalıñız mahkemede baqıluv yolunen çezile bilecek, dep saya.
Qırımğa Siemens turbinalarınıñ ketirilmesi etrafında dava iyünde başlandı. Almaniya şirketi «Tehnopromeksport»nı Avropa Birligi sanktsiyalarına riayet etmeyip yarımadağa dört gaz turbina tertibatını ketirip teslim etkeninde qabaatlay.
«Tehnopromeksport» ilhaq etilgen Qırımda, qanunsız ketirilgen Siemens gaz turbinalarını qullanıp, eki termal elektrostantsiya (TES) qura.