“Türkmen Howaýollary” Moskwa uçuçlaryny mart aýyna çenli dikeltmez
Awiakompaniýa rus neşirine "Moskwa gatnawlarynyň fewral aýynda togtadylandygyny" aýtdy, ýöne uçuşlaryň togtadylmagynyň sebäbini düşündirmedi.
“Türkmen Howaýollary” Moskwa bilen Aşgabadyň arasyndaky uçar gatnawlaryny geçen ýylyň aýagynda togtatdy.
Şonda uçar gatnawlarynyň 2024-nji ýylyň 30-njy dekabryndan 2025-nji ýylyň 31-nji ýanwaryna çenli bolmajakdygy aýdylypdy, ýöne bu karara gelinmeginiň hiç bir sebäbi görkezilmändi.
“S7 Howaýollary” awiakompaniýasy ýanwar aýynda Rosawiasiýadan Moskwa-Aşgabat uçar gatnawlaryny hepdede 14 gezek amala aşyrmak üçin rugsat aldy diýip, habarda bellenýär.
Uçuşlar 15-nji ýanwardan başlap her gün amala aşyrylyp başlandy. Şondan öň bu kompaniýa bu ugur boýunça hepdede 7 gezek uçmak rugsady bilen işleýärdi.
S7 häzirki wagtda Russiýa bilen Türkmenistanyň arasynda yzygiderli uçuşlary amala aşyrýan ýeke-täk howa gatnawydyr.
Soňky döwürde Türkmenistanda başga-da birnäçe daşary ýurt awiakompaniýasy Russiýa bilen aradaky uçar gatnawlaryny ýatyrmak kararyna geldi.
Bu uçuşlar “Azerbaýjan Howaýollarynyň” (AZAL) “Embraer 190” ýolagçy uçary 25-nji dekabrda Gazagystanyň Aktau şäheriniň golaýynda heläkçilige uçranyndan soň togtadyldy.
Azerbaýjanyň prezidenti Ylham Alyýew “Azerbaýjan Howaýollarynyň” uçarynyň heläkçilige uçramagyna “Russiýa Federasiýasynyň wekilleriniň jogapkärdigini” aýtdy.
Alyýew 6-njy ýanwarda uçar ekipažynyň betbagtçylykdan aman galan agzalary we wepat bolanlaryň garyndaşlary bilen duşuşyp, 6-njy ýanwarda eden çykyşy Azerbaýjanyň prezidentiniň web sahypasynda çap edildi.
Alyýew uçaryň Bakuwdan Çeçenistanyň paýtagty Grozna uçup baryp, gonmaga synanyşanda rus howa goragy serişdeleriniň eden işi netijesinde ýykylandygyny ozal hem aýdypdy.
Azerbaýjanyň prezidenti täze çykyşynda hereketleri "bu heläkçilikde azerbaýjan raýatlarynyň ölümine sebäp bolan" günäkärleriň jogapkärçilige çekilmegini talap etdi.
"Biz adalatlygy talap edýäris, biz günäkärleriň jogapkärçilige çekilmegini talap edýäris, biz aç-açanlygy talap edýäris" diýip, ol nygtady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.