Lebaply ýaşlar Russiýada bilim almak üçin ‘müňlerçe dollar para berýär’, käbirleri pullaryny aldyrýar
Ýaşlaryň ýene birnäçesi bolsa, rus ýokary okuw jaýlaryna girmäge ýardam etmegi wada berýän "araçy-hilegärleriň" duzagyna düşendiklerini belleýär.
Bu barada lebaply ýaşlaryň ençemesi, olaryň hossarlary we welaýatyň Baş bilim müdirligindäki çeşmämiz Azatlyk Radiosynyň sebitdäki habarçysyna gürrüň berdi.
“Ähli zat 2024-nji ýylyň dekabr aýynyň ahyrynda Russiýanyň Türkmenistandaky ilçihanasynyň resmi websaýtynda rus ýokary okuw jaýlarynda mugt bilim almak mümkinçiligi barada maglumatyň çap edilmegi bilen başlandy. Käbir adamlar bilim işgärlerine, ene-atalara ýaşlary müňlerçe dollara rus uniwersitetlerine mugt okuwa salyp bermegi teklip edip başladylar” diýip, ýagdaýlardan habarly çeşmämiz aýtdy.
Gürrüňi edilýän maglumat Aşgabatdaky rus ilçihanasynyň websaýtynda geçen ýylyň 25-nji dekabrynda çap edildi. Onda Türkmenistanyň ýaşaýjylarynyň “Russiýanyň öňdebaryjy uniwersitetlerinde aşakdaky derejelerde mugt bilim almak üçin ajaýyp mümkinçiliklere eýedigi” bellenilýär.
“Bakalawr derejesi, hünärmen derejesi, magistr derejesi, aspirantura, ordinatura, goşmaça hünär bilimi, kömekçi tejribe derejelerinde mugt bilim almak isleýän dalaşgärler 2025-nji ýylyň 15-nji ýanwaryna çenli https://education-in-russia.com web sahypasynda hasap açmaly” diýlip, maglumatda nygtalýar.
Çeşmämiz sebitiň gurluşyk kärhanalarynyň biriniň başlygynyň lebaply ýaşlaryň azyndan 16 sanysyny bu programma esasynda okuwa salandygyny aýtdy.
“Kärhananyň başlygynyň rus ilçihanasynyň wekilleri bilen ilteşiginiň bardygyna ynanylýar” diýip, ol belledi.
Azatlyk gürrüňi edilýän kärhananyň başlygy bilen habarlaşyp, teswir alyp bilmändigi sebäpli onuň şahsyýetini anyklaýan maglumatlary köpçülige ýetirmekden saklanýar.
Habarçymyz bu şahsyň “hyzmatyndan” peýdalanan türkmenabatly we saýatly ýaşlaryň dördüsi bilen söhbetdeş boldy. Olar we olaryň hossarlary araçy şahsa, saýlap alan hünär ugruna görä, 9000-11000 ABŞ dollaryny berendiklerini tassykladylar.
“Hatda biz resminamalarymyzy hem, görkezilen çelgi arkaly, Internete ýüklemedik. Olar biziň üçin ähli zady özleri etdiler” diýip, saýatly ýaşaýjy anonimlik şertinde gürrüň berdi.
Munuň bilen bir wagtda, habarçymyz ýaşlaryň arasynda rus ýokary okuw jaýlaryna girmäge ýardam etmegi wada beren araçy-hilegärleriň duzagyna düşenleriň bardygyny hem belleýär.
“Ýaşlaryň 20-den gowragy şeýle hilegärleriň duzagyna düşüp, her biri müňlerçe dollaryny aldyrdy. Käbir adamlar tanyş-bilişlerine aýdyp, ýa-da şol hilegärleri tapmaga kömek eden adamlary tapyp, pullaryny yzyna almaga çalyşýarlar. Ýöne netije bermeýär” diýip, bu ýagdaýlary başdan geçiren ýaşlaryň birnäçesi gürrüň berdi.
Azatlyk Russiýanyň Aşgabatdaky ilçihanasynyň resmi websaýtynda görkezilen telefon belgilerine jaň edip, bu ýagdaýlar barada teswir almaga synanyşdy. Ýöne redaksiýamyzyň 28-nji ýanwarda eden jaňlaryna hiç kim jogap bermedi.
Türkmenabat şäher polisiýa bölümindäki çeşmämiz adamlary duzaga düşürip, olaryň puluny alýan adamlaryň bardygy barada polisiýanyň habarlydygyny, emma olara garşy hiç hili çäre görülmeýändigini aýtdy.
“Şeýle galp araçylar, fotoşop programmasynyň kömegi bilen galp pasport kopiýasyny ýasamak bilen, dalaşgärleriň ynamyna girýärler we pullaryny alýarlar. Adatça araçynyň hyzmatyndan peýdalanmak parahorluk hasaplaýanlygy sebäpli, dalaşgärler polisiýa arz etmeýärler. Şeýle araçylaryň MHM-niň howandarlygyndan peýdalanýanlygy hakynda hem maglumatlar bar” diýip, çeşmämiz belledi.
Azatlyk bu ýagdaýlar barada sebitiň häkimiýetlerinden, şol sanda Baş bilim müdirliginden we Polisiýa müdirliginden teswir alyp bilmedi.
Russiýa türkmenistanlylaryň ýokary bilim almak we zähmet migrasiýasy üçin saýlap alýan esasy ýurtlarynyň hatarynda gelýär. Köpçülikde elýeterli bolan soňky maglumatlara görä, Russiýada 30 müňden gowrak türkmenistanly talyp ýokary bilim alýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.