Rus DIM-i “Nezawisimaýa gazetany” Türkmenistan baradaky 'tankydy' üçin tankytlaýar
Onda gazetiň "Bitaraplyk ikinji Türkmenbaşynyň şahsyýet kultuny güýçlendirmek üçin bahana boldy" diýen at bilen çap eden makalasy barada gürrüň edilýär we onuň mazmunynyň hakykatdan üzňe bolandygy, materialyň awtorynyň Türkmenistanyň ýokary syýasy ýolbaşçylaryna hüjüm edendigi aýdylýar.
Russiýa Federasiýasynyň konstitusiýasynyň 29-njy maddasy söz azatlygyny we köpçülikleýin habar beriş serişdeleriniň erkinligini kepillendirýär, ýöne häzirki ýagdaýda awtoryň diňe öz şahsy garaýşyny wyždansyz beýan eden materialynyň gürrüňi edilýär diýip, beýanatda aýdylýar.
Makalada berlen bahalaryň Russiýanyň resmi pozisiýasy bilen hiç hili baglanyşygy ýok we ol dostlukly ýurtlarymyzyň arasyndaky gatnaşyklaryň ýokary derejesini şöhlelendirmeýär. Russiýa Federasiýasy bilen Türkmenistanyň arasyndaky gatnaşyklar çuňňur strategiki hyzmatdaşlyk häsiýetine eýe bolup, öňden gelýän dostluk, birek-birege hormat goýmak, içerki işlere goşulmazlyk we birek-biregiň bähbitlerine üns bermek ýörelgelerine esaslanýar diýip, Russiýanyň DIM-i ýazýar.
Şeýle-de, beýanatda iki ýurduň söwda we ykdysady, ulag we logistika, medeni we gumanitar, bilim ugurlaryndaky hyzmatdaşlygynyň yzygiderli ösýändigi bellenip, habar serişdeleriniň öz çap edýän makalalaryna jogapkärçilikli çemeleşmegi soralýar.
Rus neşiriniň gürrüňi edilýän makalasynda syýasatşynas 1990-njy ýyllaryň başynda, Türkmenistanyň bitaraplygy baradaky ideýanyň ozaly öňki daşary işler ministri Boris Şyhmuradowa degişli bolandygyny, onuň 2002-nji ýyldaky agdarylyşyk synanyşygy diýilýände aýyplanyp, 2003-nji ýylda ömürlik türme tussaglygyna höküm edilendigini we ýitirim bolandygyny ýatladýar.