Media: Ysraýyl we HAMAS zamunlary alyşmak meselesindäki oňşuksyzlygy aradan aýyrdy
"Al Arabiýa" teleýaýlymynyň habaryna görä, HAMAS toparynyň ýokary derejeli agzalarynyň boşadylmagy baradaky talaplaryny soňa goýmak bilen, taraplar Katarda geçirilen gepleşiklerde şertnama girizilmeli gutarnykly düzedişler barada ylalaşyga geldiler.
Ysraýylyň harby kabineti gelnen ylalaşyklary tassyklamak üçin 17-nji ýanwarda ýygnanyşar.
ABŞ resmileri 16-njy ýanwar güni giçlik Ysraýyl bilen HAMAS toparynyň arasynda palestinalylaryň zamun alnanlaryň deregine boşadylmagyny talap edýän birnäçe tussagynyň üstünde ylalaşyp bilmändiklerini aýtdylar.
Ylalaşygyň birinji tapgyry 19-njy ýanwarda başlanar. Zamun alnanlaryň üçüsi şu gün boşadylýar diýip, habarda aýdylýar.
Ysraýyl bilen HAMAS toparynyň wekilleriniň Gaza zolagynda atyşygy bes etmek we zamun alnanlary tussaglar bilen alyşmak barada ylalaşyk gazanandygy 15-nji ýanwarda mälim boldy.
Ysraýyl 16-njy ýanwarda palestinalylary ylalaşygy bozmak synanyşygynda aýyplady. HAMAS toparyň ylalaşylan resminama boýun bolmagyna galýandygyny aýtdy.
Ylalaşygyň şertlerine görä, ilkinji etapda IDF, Ysraýylyň goranyş goşuny Gazadaky esgerlerini çykaryp başlar we HAMAS jihadçylar tarapyndan 2023-nji ýylyň 7-nji oktýabrynda zamun alnan 33 adamy boşadar.
Taraplar ikinji tapgyrda, Ysraýylyň türmelerinde saklanýan müň çemesi palestinaly tussagyň deregine, atyşygy doly togtatmak we galan zamanlary boşatmak ylalaşygyna geldiler.
Taraplar ylalaşygyň üçünji tapgyrynda ölenleriň jesetlerini çalyşmaly.
Şondan soň, Müsüriň, Kataryň we BMG-niň gözegçiligi astynda, Gaza zolagyndaky dikeldiş işleriniň başlanmagy göz öňünde tutulýar.