Maryda motosikl ogurlygy köpelýär
"Mary welaýatynyň Ýolöten etrabynda soňky aýlarda motosikl ogurlygy köpeldi. Şeýle-de, geňeşliklerde goýun, geçi, welosiped we hojalyklarda daşarda goýulýan zatlar ogurlanýar" diýip, polisiýadaky çeşme aýdýar.
Azatlyk bilen anonimlik şertinde gürleşen polisiýa işgäri ogurlyk hadysalarynyň köpdügini we olaryň köpüsiniň üstüniň açylmaýandygyny aýdýarlar. Ýerli ýaşaýjylar bolsa, polisiýa ýiten zadyny gözläp, tapyp bermänsoň ogurlanan zatlaryny özbaşdak gözläp başlandygyny gürrüň berdiler.
"Meniň işigimde duran motorym ogurlandy. Men ol motor bilen ekin meýdanyna giderdim, indi ýöräp gidýärin. Men iki aýdan gowrak wagt bäri ogurlanan motorymy gözledim we tapdym ony tigire çalyşypdyrlar" diýip, ýerli ýaşaýjy gürrüň berdi.
Ýolöteniň bu ýaşaýjysynyň sözlerine görä, ol öz motosiklini tanap, ony münüp barýan adam bilen gürleşip, ýagdaýy anyklapdyr.
"Men doly anyklamakçy boldum. Nireden we kimden aldyň diýip, soranymda ol biriniň adyny aýtdy we özüniň 400 manat pul hem tigir berip, motor edinendigini aýtdy" diýip, maryly ýaşaýjy gürrüň berdi.
Onuň sözlerine görä, ol tapan emlägini yzyna almak üçin ýene-de polisiýa ýüz tutupdyr we çäre görmegi, ogurlanan motisiklini alyp bermegini sorapdyr. Emma bu özi üçin goşmaça problemalary döredipdir.
"Polisiýa şol motorymy alyp, 'seňki däl, seniňki bolsa subut et hany dokumentiňi görkez' diýdi. Häzir etrapda ýaşaýjylaryň tas ählisi dokumentsiz motosikl sürýär. Muny polisiýanyň özi hem bilýär. Men motorymy özüm bejerdim we reňkledim. Ramasynda swarka edilen ýerleri barada aýtdym we kraskasyny aýyryp, synlasaňyz meniň eden işlerim we belliklerim bar diýip, görkezdim. Emma olar munuň delil däldigini aýdyp, meni polisiýa bölüminden kowdular. Polisiýa maňa dokument görkezsem motosikliň beriljekdigini aýtdy" diýip, maryly ýaşaýjy gürrüň berdi.
Marynyň ýene bir etrap ýaşaýjysy öz öýüniň ýanynda ogurlanan motosiklini Türkmengala etrabynda tapypdyr. Ol öz ýagdaýy barada Azatlyga şeýle gürrüň berdi: "Türkmengala etrabynyň bir ýaşaýjysynyň motorymy münüp, sürip ýörenini görenimde ýanyna bardym we nireden, näçä alandygyny soradym. Ol 'bir tanyşym - polisiýa işgäri maňa 1500 manada satdy' diýip aýtdy".
Habarçymyzyň sözlerine görä, welaýatda şeýle-de tigirler we hojalykdaky mallar ogurlanýar. Şeýle-de, raýatlaryň ogurlanan zatlaryny tapyp bermäge ýardam hödürleýän araçylar hem peýda bolýar. Emma olaryň soraýan pulunyň mukdary ýiten zatlaryň nyrhyndan ýokary. Hususan-da ogurlanan motosikl üçin 2 müň manat para soralýar.
Azatlyk Radiosy Mary welaýatynyň polisiýa wekillerinden resmi görnüşde maglumat alyp bilmedi. Emma anonimlik şertinde gürleşen maryly polisiýa işgärleri ogurlyk hadysalarynyň köpdügini we olaryň ençemesiniň üstüniň açylman galýandygyny tassykladylar.
Türkmenistandaky ogurlyk hadysalary barada habarçylaryň yzygiderli berýän maglumatlary ýurtda ilat köpçüliginiň sosial-ykdysady ýagdaýynyň ýaramazlaşýan döwrüne we korrupsiýanyň, şol sanda polisiýadaky parahorlugyň möwç alan wagtyna gabat gelýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.