BMG Gazadaky söweşleriň gaýtadan başlanmagyny ‘betbagtçylyk’ häsiýetlendirip ýazgarýar
Birleşen Milletler Guramasynyň Ženewadaky ynsanperwer edarasynyň metbugat sekretary Ýens Laerke urşuň gaýtadan başlanmagynyň “Gaza zolagyna dowzahyň durmuşynyň dolanyp barýandygyny” aňladýandygyny aýtdy.
Bir hepde töweregi dowam eden ýaraşygyň tamamlanyp, onuň möhletiniň uzaldylmazlygy bilen, Ysraýylyň söweş uçarlary Gazany gaýtadan bombalamaga başlady, asuda palestinalylar pena gözledi.
“Gazadaky urşuň gaýtadan başlanmagy betbagtçylykdyr” diýip, Birleşen Milletler Guramasynyň adam hukuklary boýunça ýokary komissary Wolker Turk aýtdy.
Birleşen Milletler Guramasynyň baş sekretary Antonýu Guterriş X sosial media platformasynda paýlaşan postunda urşuň gaýtadan başlanmagyna gynanýandygyny hem-de täze bir arakesmäniň ylalaşylmagyna umyt bildirýändigini aýtdy.
“Urşuň gaýtadan başlanylmagy diňe hakyky ynsanperwer ýaraşygynyň nä derejede möhümdigini görkezýär” diýip, ol aýtdy.
Laerke bir hepde dowam eden ýaraşykda uly göwrümli ynsanperwerlik ýardamlarynyň gür ilatly Gaza zolagyna eltilendigini, ýardamlaryň hatda arakesmeden ozal tas doly diýen ýaly üpjünçilikden mahrum bolan demirgazyk Wadi Gaza sebitlerine-de baryp ýetendigini aýtdy.
ABŞ we ÝB tarapyndan terror guramasy diýlip kesgitlenen Hamas bilen Ysraýylyň arasynda bir hepde dowam eden ýaraşygyň möhletiniň 1-nji dekabrda tamamlanmagyndan birnäçe minut soňra, ysraýyl söweş uçarlary Gaza zolagyndaky nyşanalara zarba urdy we uruş doly güýjünde gaýtadan başlady.
Gabaw astyndaky territoriýadan gara tüsse asmana göterildi, Ysraýyl günorta Gazanyň käbir sebitlerine asmandan duýduryş hatlaryny taşlap, adamlara öz öýlerini terk etmeklerini duýdurdy. Bu bolsa, onuň hüjümi giňeltmäge taýýarlanýandygy barada pikir döredýär.
Ysraýyl harbylarynyň zarbalary yglan etmegi anna güni ýerli wagt bilen irden sagat 7:00-de, (Aşgabat wagty bilen irden sagat 10:00), ýaraşygyň möhletiniň tamamlanmagyndan bary-ýogy 30 minut soňra bolup geçdi.
Biraz öň, Ysraýyl Hamasy ýaraşygyň şertlerini bozmakda, şol sanda Gazadan Ysraýyla tarap raketa atmakda aýyplady.
Uruş arakesmesi 24-nji noýabrda başlady. Ýaraşyk ilki başda dört gün dowam etdi, soňra birnäçe gün möhlet bilen uzaldyldy.
Bir hepde dowam eden ýaraşykda Hamas we Gazadaky beýleki jeňçiler Ysraýyldaky 240 palestin tussagynyň erkinlige goýberilmeginiň öwezine, 100-den gowrak zamuny boşatdy. Olaryň aglaba bölegi ysraýyllylar bolup durýar.
Bu aralykda, ABŞ-nyň döwlet sekretary Gazada asuda ilat üçin howpsyz zolaglaryň döredilmegi boýunça Ysraýyla çagyryş edýär.
Birleşen Ştatlaryň döwlet sekretary Entoni Blinken 30-njy noýabrda Ysraýyly, harby operasiýalara başlamazdan ozal, Gazada asuda palestinalylar üçin howpsuz zolaglary döretmäge çagyrdy.
Ysraýyl “bigünä palestinalylaryň adam ýitgilerini mundan-da beýläk azaltmak üçin, ynsanperwer raýat goraglylygy meýilnamalaryny durmuşa geçirmeli” diýip, ol Tel Awiwde žurnalistlere aýtdy.
Blinken bu sözleri Gazada palestinaly tussaglaryň öwezine bir topar zamunyň boşadylmagyna şaýat bolan arakesmäniň ýedinji gününde aýtdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.