Çeşmeler: Aşyrbaý Bekiýewe 23 ýül türme tussaglygy berildi
Hukuk goraýjy Witaliý Ponomarewiň we “Türkmen.news” neşiriniň öz çeşmelerine salgylanyp ýazmagyna görä, awgust aýynyň aýagynda Russiýadan Türkmenistana iberilen Aşyrbaý Bekiýewe Daşoguzda 23 ýyl türme tussaglygy hökümi çykaryldy.
Türkmenistanda “yslam ekstremizminde” aýyplanyp gözlenen Bekiýew awgust aýynyň aýagynda, Adam hukuklary boýunça Ýewropa kazyýetiniň kararyna garamazdan, Russiýadan Türkmenistana ekstradisiýa edildi.
Bekiýewiň maşgalasy bilen baglanyşykly çeşmä salgylanyp berlen maglumata görä, kazyýet işi 11-nji oktýabrda, Daşoguzdaky welaýat kazyýetinde, ýapyk gapylaryň arkasynda geçirildi.
Aýyplanýanyň hossarlary geldiler, ýöne diňlenişige goýberilmediler diýip, habarda aýdylýar.
Bekiýewiň aklawçysy onuň garyndaşlaryna öz müşderisine 23 ýyl türme tussaglygy höküminiň çykarylandygyny aýdypdyr.
“Turkmen.”news” neşiriniň ýazmagyna görä, Bekiýew özüne bildirilýän aýyplamalaryň ählisini ret edipdir.
Şeýle-de, habarda Aşyrbaý Bekiýwewiň ýene bir doganynyň, Täçmyradyň häzir Sankt-Peterburgdaky deslalapky tussaghanada Türkmenistana iberilmegine garaşylýandygyny, onuň hem “yslam ekstremizimnde” aýyplanýandygy aýdylýar.
Hukuk goraýjylar Bekiýewiň galplaşdyrylan, esassyz aýyplamalar esasynda saklanyp, uzak möhletli tussaglyga höküm edilendigini aýdýarlar.
Türkmenistan raýatlarynyň dine ynanmak we ynanmazlyk azatlyklaryny yzygiderli çäklendirmekde we onlarça dindary, hususan-da “gülençiler” diýlip hasaplanýanlary bikanun, galplaşdyrylan aýyplamalar esasynda, urlup-ýenjilip alnan görkezmeler bilen uzak möhletli türme tussaglygyna höküm etmekde tankytlanýar.
Bu hili tussaglaryň birnäçesiniň türmelerdäki agyr şertler esasynda ýogalandygy habar berildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.