Türkmenabatda köne we ýyrtyk manat köpelýär, ilat ‘hapa kagyz böleginiň’ ýarawsyzdygyny aýdýar
Türkmenistanda her aýyň başky günlerinde ilatyň pensiýalary, döwlet kömek pullary we aýlyklary bank kartlaryna geçirilýär. Munuň yzýany welaýat merkezleriniň çäkli bankomatlarynyň pul nagtlaşdyrmakdaky kynçylyklary hasam ýitileşýär.
Ýurduň iri şäherlerinde nagtsyz söwda etmek mümkinçilikleri çäkli bolup, şol sanda söwda merkezlerinde, döwlet edaralarynda ornaşdyrylan töleg terminallary hem kadaly işlemeýär. Bu sebäpli ilatyň nagt pula mätäçligi henizem uly bolmagynda galýar.
Emma soňky günlerden bäri Türkmenabatda raýatlaryň ençeme sagatlap nobatda durup, çäkli mukdardaky nagtlaşdyryp bilen pul serişdesini soňy bilen harçlap biljekdigi hem gümana bolmagynda galýar.
“Bagtyň çüwüp nobatyň ýetse, Türkmenabadyň bankomatlaryndan bir günüň dowamynda adam başyna 800 manat nagtlaşdyryp bolýar. Emma indi olaryň ýarpysy töweregi ýyrtyk, hapa, skoç bilen ýelmenen manatlardan ybarat. Olaryň arasynda 50, 100 manatlyk uly kupýoralar hem köp” diýip, türkmenabatly bilim işgärleriniň biri 6-njy iýunda habarçymyza gürrüň berdi.
Ol bu ýagdaýdaky banknotlary diňe bir söwdagärleriň däl, şol sanda dürli sosial tölegleri kabul etmeli döwlet edaralarynyň hem kabul etmeýändigini belledi.
“Köne puly beren bankomatyň hut özüniň ýerleşen bankyna baryp, bulary çalşyp bermegini talap etdik. Emma bankyň işgäri özerine hem Merkezi Bankdan şu görnüşdäki pullaryň gelýändigini aýdyp, özleriniň hiç hili kömek edip bilmejekdigini duýdurdy. Bu nähili beýle bolýar?! Halal gazanan zähmet hakyňy almak bir görgi, onuň soňy bilen hapa kagyz bölegi bolup galmajakdygy başga bir gaýgy” diýip, 50 ýaşlaryndaky mugallym habarçymyza nägileligini bildirdi. Söhbetdeşimiziň howpsuzlygy jähtinden anyk seneleri we ýer atlaryny äşgär etmeýäris.
Köne banknotlar bilen emele gelen ýagdaýlar, adatça bolşy ýaly, ýerli metbugatda beýan edilmeýär. Emma Türkmenabadyň banklarynyň biriniň işgäriniň habarçymyza anonimlik şertinde aýtmagyna görä, bu ýurtdaky köpçülikleýin nagt pul ýetmezçiligi bilen bagly.
Şular ýaly ýagdaýlar mundan üç aý ozal Balkan welaýatynyň iri şäherlerinde hem başlanypdy. Şonda söwda üçin ýarawsyz köne banknotlardan has köp ýerli telekeçileriň ejir çekendigi bellenipdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.