Türkmenabadyň polisiýasy okuwçylaryň telefonlaryny barlap, 'kalýanly suratlary' gözledi
"Bu barlaglar şäheriň polisiýa bölüminiň işgärleri tarapyndan 18-nji fewralda geçirildi. Synp otaglaryna duýdansyz giren bu işgärler ýokary synp okuwçylaryň mobil telefonlaryny ellerinden alyp, olaryň "Galereýa" bölümindäki suratlary barladylar" diýip, Azatlyk Radiosynyň sebitdäki habarçysy 20-nji fewralda aýtdy.
Bilim işgärleriniň, ene-atalaryň we okuwçylaryň birnäçesiniň anonimlik şertinde tassyklamagyna görä, polisiýa işgärleri mobil telefonlarda okuwçylaryň kalýan, ýagny suw çilimini çekip düşen suratlaryny gözlediler.
"Ýokary synp okuwçylaryň ençemesi 14-nji fewralda şäheriň kafeleriniň birinde üýşüp, kalýan çekipdirler. Olar kalýan çekip duran pursatlaryny surata düşürip, ony sosial ulgamlarda paýlaşypdyrlar. Polisiýa işgärleri 'kalýanly surata' düşen şol okuwçylaryň ellerinden mobil telefonlaryny ýygnap aldylar" diýip, türkmenabatly bilim işgäri aýtdy.
Barlaglardan soňra okuwçylar we olaryň ene-atalary polisiýa bölümine çagyryldy. Okuwçylar kalýany haýsy kafede çekendigi barada sorag-jogap edildi we olardan bu barada düşündiriş alyndy.
"Okuwçylaryň ýaşy 18-e ýetmeýändigi üçin olaryň ene-atalaryna diňe pul jerimesi töledildi. Ýöne polisiýa işgärleriniň kafeniň administrasiýa işgärlerine nähili çäre görendigini anyklap bolmady. Olaryň soňky ykbaly belli däl" diýip, habarçy belledi.
Azatlyk bu ýagdaýlar barada Türkmenabadyň Polisiýa müdirliginden goşmaça maglumat ýa kommentariýa almaga synanyşdy. Ýöne redaksiýamyzyň 20-nji fewralda telefon arkaly eden synanyşyklary oňyn netije bermedi.
2010-2020-nji ýyllar aralygynda ýurtda çilimiň ornuny belli bir derejede kalýan çekmek däbi tutdy. Şol döwürde temmäkiniň gündogar medeniýetine mahsus bu görnüşiniň ýaşlaryň arasyndaky meşhurlygy artdy.
Ýöne soňky bäş ýyl çemesi wagt bäri türkmen häkimiýetleri bu däbiň öňüni almak boýunça çärelerini güýçlendirdiler. Habarçymyzyň maglumatyna görä, Türkmenistanda köpçülik ýerlerinde, şol sanda kafelerde, restoranlarda, barlarda, hatda öz ýaşaýan öýüňde kalýan çekmek döwlet tarapyndan gadagan edilýär.
Şeýle-de, häkimiýetler kalýan çiliminiň şiresini satýan raýatlary hem yzarlaýarlar. Gadagançylygy bozan raýatlara we telekeçilere ýüzlerçe, käte müňlerçe manat möçberinde pul jerimesi salynýar.
"Gadagançylyga we uly möçberdäki pul jerimesine garamazdan, köp kafeleriň we restoranlaryň administrasiýasy özleriniň tanyş-bilişlerine kalýan çilimlerini hödürleýärler" diýip, habarçy aýtdy.
Lebapda häkimiýetleriň kalýan ulanylyşyna gözegçiligi güýçlendirmegi, ýurtda temmäki we alkogol önümleriniň söwdasyna gözegçiligiň güýçlendirilmeginiň, şeýle-de temmäki önümleriniň gümrük tölegleriniň möçberiniň soňky ýarym ýylda iki gezek artdyrylmagynyň yz ýanyna gabat geldi.
Türkmenistan 2025-nji ýyla çenli ýurdy temmäkiden azat etmek ugrunda tagalla edýändigini aýdýar. Geçen ýylyň fewralynda Türkmenistany temmäkiden azat ýurda öwürmek boýunça 2022-2025-nji ýyllar üçin Milli maksatnama tassyklandy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.