Russiýada 41 müňden gowrak türkmen ýaşaýar
Sorag anketalarynda olar özlerini “türkmen” diýip atlandyrmakdan başga "aşgabatly”, “teke”, “truhmen” (rus imperiýasy döwründe türkmenler köplenç şeýle atlandyrylypdyr), şeýle-de “türkmen dilli türk” diýip atlandyrypdyrlar.
2010-njy ýylyň ilat ýazuwynyň netijeleri Russiýada 36,885 türkmeniň ýaşaýandygyny görkezipdi. Şeýlelikde, soňky 11 ýylyň dowamynda Russiýada ýaşaýan türkmenleriň sany 4 453 adama çenli ýa-da 12,1% köpeldi.
Şol bir wagtda, 2021-nji ýyldaky netijeler Russiýada ýaşaýan türkmen erkekleriniň sanynyň 22,795, türkmen aýallarynyň sanynyň 18,543 bolandygyny görkezdi.
Bu ýurtda ýaşaýan türkmenleriň 32% -e golaýy (13142 adam) 20-29 ýaş aralygyndaky raýatlar, bu Russiýadaky türkmenleriň saldamly böleginiň bu ýere gelen we ýaşamaga galan ýaş adamlardygyny aňladyp biler diýip, habarda bellenýär.
23,638 türkmen (57,2%) şäher ilatyna, 17,700 türkmen (42,8%) oba ilatyna degişli. Oba ýerlerinde ýaşaýan türkmenleriň aglaba köplügini 300 ýyldan gowrak wagt bäri Russiýada ýaşaýan Stawropol we Astrahan türkmenleri düzýär.
2021-nji ýylda geçirilen ilat ýazuwyna görä, Russiýada 147,182,123 adam ýaşaýar. Olaryň arasynda 130,587,364 adam ýazuw geçirilen wagty öz milletini görkezdi.