Azatlygyň žurnalistleri ýanwar wakalarynyň pidalaryna dikilen ýadygärligiň açylyşyna goýberilmedi

23-nji dekabrda irden Almatyda, prezident Kassym-Žomart Tokaýewiň gatnaşmagynda, ýanwar wakalarynyň pidalarynyň hatyrasyna gurlan ýadygärligiň açyljakdygy belli boldy.

Respublika meýdançasynyň töwereginde polisiýa işgärleri toplandy, dabara gatnaşjak adamlary, şol sanda býujet edaralarynyň işgärlerini toplap, awtobuslarda getirdiler. Emma howpsuzlyk güýçleri, ygtyýarnamalarynyň ýokdugyny aýdyp, Azatlyk radiosynyň habarçylaryny bu çäre goýbermediler.

Almaty häkimliginiň metbugat gullugy häzire çenli Azatlyk radiosynyň redaksiýasyna hiç bir düşündiriş bermedi. Bu çäre öňünden yglan edilip, ygtyýarnama meselesi gozgalmady.

"Tіl kespek žok" telegramm kanalynda, "Gazagystan" milli teleýaýlymynda 23-nji dekabrda ýanwar wakalarynda ölenleriň hatyrasyna Almatyda "Tagzym" ýadygärliginiň açylandygy habar berildi. Bu çäräniň geçirilen ýerine diňe döwlet eýeçiligindäki metbugatyň žurnalistleri goýberildi.

Döwlet telekanallarynda efire berlen wideoýazgylarda Kasym-Žomart Tokaýewiň münberden çykyş edişi, ýadygärlige gül goýýan adamlar görkezildi.

Tokaýewiň gatnaşmagynda açylan ýadygärlikler toplumynyň awtorynyň kimdigi belli däl.

Gazagystanyň iň uly şäheri bolan Almatyda ýylyň başynda hökümete garşy başlanan parahat protestler giň gerimli bidüzgünçilige öwrüldi.

Protestler ýykgynçylyklara ýazyp, Almatyda häkimligiň binalary we döwlet baştutanynyň rezidensiýasy ele salnyp, oda berlende, Gazagystanyň prezidenti Kasym-Žomart Tokaýew ýurtda adatdan daşary ýagdaý yglan etdi we howpsuzlyk güýçlerine duýduryş bermezden atmak buýrugyny berdi.

Resmi maglumatlara görä, ýanwar wakalarynda 238 adam, şol sanda 19 howpsuzlyk işgäri öldi.