TN: Lebabyň çagalar baglarynda we internatlarynda barlaglar geçirilýär
Neşiriň maglumatyna görä, ýurduň Ýokary gözegçilik palatasy tarapyndan geçirilýän barlaglarda döwlet tarapyndan çagalar baglary we internatlar üçin iberilýän azyk önümleriniň, şol sanda etiň bu edaralara doly gowuşmaýandygy anyklandy.
"Döwletiň ýeterlik haryt bölüp berýändigi aýdylýar, ýöne et, un we gök önümler çagalaryň däl-de, banket zallaryndaky myhmanlaryň stolunyň üstüne goýulýar" diýip, maglumatda bellenýär.
Barlaglar döwründe käbir internatlaryň ammarlarynda azyk önümleriniň juda köpdüginiň, hatda olaryň ençemesiniň çüýrändiginiň üsti açyldy.
Garaşsyz neşir döwlet tarapyndan iberilýän önümler çüýreýän mahaly, çagalar baglaryndaky we internatlardaky çagalaryň ýeterlik azyk bilen üpjün edilmeýändigini hem habar berýär.
"Çagalar baglaryndaky körpelere kaşa bilen bir inçe döwüm çörek, şekersiz çaý ýa-da kakadylan erigiň kompotyny berýärler. Käwagty olara ýarym alma, kiçijek kädili ýa-da kartoşkaly somsa berýärler. Hatda hasyl möwsüminde hem çagalara çüýrük almadan başga miwe berilmeýär" diýip, neşir belleýär.
Azatlyk barlaglar barada özüniň ýurt içindäki habarçylaryndan we çeşmelerinden, şeýle-de sebitiň bilim we terbiýeçilik edaralaryndan goşmaça maglumat alyp bilmedi.
Ýöne habarçylarymyz ýurduň çagalar baglarynda we internatlarynda wagtal-wagtal geçirilýän barlaglar, şeýle-de bu edaralar üçin iberilýän azyk önümleriniň çagalara doly gowuşmaýandygy, olarda iýmitiň hiliniň pesdigi barada mundan ozal ençeme gezek habar beripdiler.
2019-njy ýylyň ahyrynda ýurduň terbiýeçilik edaralarynda geçirilen barlaglardan soň, Aşgabadyň çagalar bagynyň resmisiniň körpeleriň iýmitini dükanlara satmakda aýyplanyp tussag edilendigi mälim boldy.
Ýöne habarçylarymyz şeýle barlaglaryň köplenç oňyn netijesiniň bolmaýandygyny, häkimiýet wekilleriniň para bilen kemçiliklere göz ýummagy ýaly wakalaryň köp bolýandygyny hem aýdýarlar.
2017-nji ýylda Türkmenistanda çagalar baglarynyň aýlyk tölegi duýdansyz 10 esse töweregi ýokarlanyp, 8 manatdan 80 manada galdyryldy. Şonda käbir çagalar baglarynyň müdirleri ene-atalara çagalaryň naharlarynyň gowulanjakdygyny aýdypdylar. Ýöne geçen ýyl Azatlyk bilen söhbetdeş bolan lebaply ene-atalaryň ençemesi şondan bäri hiç hili özgerişligiň bolmandygyny aýtdy.
Türkmen hökümeti we döwlet gözegçiligindäki metbugat serişdeleri çagalaryň akyl, ruhy-ahlak we beden taýdan sagdyn ösüp ýetişmekleri üçin ähli şertleriň döredilendigini tekrarlaýarlar. Ýöne ýokarda aýdylanlar barada mesele gozgalmaýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.