Bagdatda müňlerçe adam ABŞ-nyň Yrakda öz harbylaryny saklamagyna garşy protest geçirýär
Bu çagyryş ruhany Moktada al-Sadr tarapyndan edildi.
Ýörişe gatnaşýanlar Bagdadyň merkezindäki al-Hurriýa meýdanynda we şäheriň esasy uniwersitetiniň golaýynda üýşüp başladylar. Ýörişe gatnaşýanlar hökümete garşy köpçülikleýin protestleriň simwolyna öwrülen Tahrir meýdanyna barmadylar.
Aýallar we erkekler Yragyň baýdaklaryny galgadyp, Siriýadaky we Yrakdaky “Yslam döwleti” toparynyň söweşijilerine garşy harby koalisiýa liderlik edýän Birleşen Ştatlara garşy şygarlary gygyrdylar.
5-nji ýanwarda Yragyň parlamenti daşary ýurt harbylarynyň ýurdy terk etmegine çagyrýan rezolýusiýany kabul etdi. Bu waka 3-nji ýanwarda ABŞ-nyň howa zarbasy netijesinde Eýranyň ýokary derejeli harby komandiri Kasem Süleýmaniniň öldürilmeginiň yzýanyna gabat gelipdi.