Муносибатҳои Тоҷикистону Чин дар аҳди коронавирус чӣ гуна хоҳад буд?
Си Ҷинпин, раиси ҷумҳурии Чин гуфтааст, Пекину Душанбе бояд ҳарчи зуд талошҳои худро барои муқобила бо бемории COVID-19 ва рушди тиҷорати дуҷониба ҳамоҳанг кунанд. Хабаргузории "Синҳуа" аз қавли Ҷинпин навишт, "муносибатҳои Чину Тоҷикистон ба нуқтаи нави таърихии худ расид".
Хадамоти матбуоти президенти Тоҷикистон низ аз суҳбати телефонии раҳбарони ду кишвар гузориш дод, вале тафсилотро ошкор накард. Дар хабарномаи расмӣ гуфта шудааст, ду тараф "ҳамкориҳоро дар бахшҳои тиббу дорусозӣ, технологияҳои нав ва навоварӣ низ баррасӣ карданд".
Хабаргузории "Синҳуа"-и Чин ба нақл аз Си Ҷинпин навишт, ду кишвар зудтар тарҳи ҳамкориҳоро дар давраи коронавируси нав, бахусус дар бахшҳои тиҷорату сармоягузорӣ, энержӣ ва кишоварзӣ бикашанд, то ба пешрафтҳои нав ноил гарданд.
Раҳбари Чин гуфтааст, дӯстони воқеиро дар лаҳзаҳои мушкил мешиносанд ва аз "ҳимояти давлату мардуми Тоҷикистон" аз талошҳои он кишвар ба муқобили бемории ҳамагир ситоиш кардааст.
Бемории коронавируси нав охири соли гузашта дар шаҳри Вуҳани Чин кашф шуд ва то ин дам беш аз 8 миллион касро дар ҷаҳон гирифтор карда, боис ба марги беш аз 430 нафар шудааст.
Мақомоти Чинро, ки бештар аз 1,4 миллиард аҳолӣ дорад, дар пинҳон кардани омори воқеии гирифторон ва қурбониёни COVID-19 айбдор мекунанд, аммо роҳбарияти Чин ин айбҳоро беасос медонад.
Тоҷикистон танҳо охири моҳи апрел вуҷуди бемориро эътироф кард ва то кунун беш аз панҷ ҳазор нафар бемор шуда, 50 кас фавтидаанд. Бар асоси омори расмӣ, беш аз 3600 кас шифо ёфтаанд.