Аз бархурди ду қатор дар Туркия дастикам нуҳ нафар ҷон бохт
Дар натиҷаи баҳам бархурдани ду қатор дар наздикиҳои Анкара, пойтахти Туркия, дастикам нуҳ нафар ба ҳалокат расид. Теъдоди захмиҳо то ҳол 46 нафар гузориш шудааст. Волии Анкара Восип Шоҳин гуфт, ки эҳтимол теъдоди қурбониҳо бештар шавад.
Садама соати 6:30-и вақти маҳаллӣ дар истгоҳи роҳи оҳани Енимаҳалла, воқеъ дар канораҳои пойтахти Туркия, ҳамагӣ даҳ километр дуртар аз нуқтаи ҳаракат рух дод. Қатори босуръати Анкара -Кония ба як локомотив бархурд.
Дар натиҷаи ин бархурд якчанд вагон аз хат берун шуд ва пули пиёдагарди фарози роҳи оҳан ба рӯи қатор афтид. То ҳол аз ҳалокати се ронандаи қатор ва шаш мусофир гузориш шудааст. Наҷотдиҳандагон ба ҷойи ҳодиса омаданд ва зарардидаҳоро дар зери оворҳо ҷустуҷӯ мекунанд.
Додситонии Туркия гуфт, ки аз рӯи ин ҳодиса парванди ҷиноӣ боз шудааст.