د افغان پنا غوښتونکو پر وضعیت خبرې؛ درې لوړپوړي امریکایي چارواکي پاکستان ته ځي
د امریکا متحدهایالاتو د بهرنیو چارو وزارت درې لوړ پوړي چارواکي پاکستان ته ځي، څو په دې هېواد کې د مېشتو هغو افغان کډوالو په اړه چې د متحدهایالاتو ویزو ته یې غوښتنلیکونه سپاري، له پاکستان چارواکو او نورو ادارو سره خبرې وکړي.
تمه ده چې له درېیو چارواکو څخه لومړنۍ یې(د متحدهایالاتو د بهرنیو چارو په وزارت کې د وګړو او مهاجرینو چارو مرستیاله جولیتا والس نویس) نن اسلاماباد ته ورسېږي.
د امریکا متحدهایالاتو د بهرنیو چارو وزارت د ډسمبر په لومړۍ نېټه یوه اعلامیه کې لیکلي، اغلې نویس به د ډسمبر تر اوومې نېټې په پاکستان کې حکومتي چارواکو، غیر حکومتي او د نړيوالو سازمانونو استازو سره د هغو افغانانو په اړه خبرې وکړي چې امریکا او نورو هېوادونو ته د تلو په موخه په دې هېواد کې ځای پر ځای دي.
په دې اعلامیه نوره توضیح نهده ورکړل شوې، خو له کله چې پاکستاني حکومت د افغان کډوالو د ایستو لړۍ پیل کړې، متحدهایالاتو د هغو افغانانو لپاره چې امریکا ته د تلو قضیې لري خوندیتوب سندونه ورکړي؛ څو امنیتي ځواکونه یې اخراج نهکړي.
په اسلاماباد کې د امریکا متحدهایالاتو سفارت د واټساپ یوه شمېره هم اعلان کړې او له هغو افغانانو یې چې د امریکا ته د تلو په شرایطو برابر دي غوښتي چې د ستونزې پر مهال ورسره په دې شمېره اړیکه ونیسي.
خو له دې ټولو سره سره، یو شمېر افغان کډوالو شکایت کړی چې پاکستاني پولیس یې ځوروي.
ښايي همدې اندېښنو د امریکا متحدهایالاتو لوړ پوړو چارواکی سفر ته اړ کړي وي.
پاکستان د اکتوبر میاشتې له پیله له دغه هېواده د افغان بې اسناده کډوالو د اېستلو لړۍ پیل کړې او تر اوسه تله څلور لکو زيات افغان کډوال له دغه هیواد افغانستان ته ستانه کړل شوي دي.
په ورته وخت کې پاکستانۍ ایکسپریس ټریبیون ورځپاڼې لیکلي، د ډسمبر په اوومه نېټه به د افغانستان لپاره د امریکا متحدهایالاتو ځانګړی استازی ټام ویسټ هم پاکستان ته سفر وکړي او ورپسې به د ډسمبر په ۹مه د پاکستان په چارو کې د امریکا د ځانګړي استازي مرستیاله الزابیټ هرسټ هم اسلاماباد ته سفر ولري.
د افغان کډوالو د اخراج په ګډون وروستیو کې د پاکستان او د طالبانو حکومت ترمنځ اړیکې هم کړکېچنې ښکاري او د پاکستان موفت حکومت طالبانو تورنوي چې په افغانستان کې یې د هغو ډلو پر ضد سخت عکسالعمل نهدی ښودلی چې په پاکستان کې ترهګر بریدونه کوي.
خو د طالبانو حکومت بیا ویلي، دوی په بل هېواد کې د نا امنۍ مسوول نهدي او په پاکستان کې یې نا امني د دې هېواد کورنۍ موضوع بللې ده.