پوتين بېلاروس ته د واګنر ډلې د مشر له تلو سره موافقه کړې
ایفګیني پریګوژین چې سرتېري یې د اوکراین په جګړه کې د روسي ځواکونو تر ټولو اغېزناک سرتېري وو، د ټوپک شپېلۍ د روسي پوځیانو خواته اړولې.
هغه پرون شنبه د یوه وسله وال خوځښت مشري وکړه او په روستوف ښار کې یې د ځینو سیمو له لاندې کولو وروسته خپلو، د ده په ټکو ۲۵ زره سرتېرو ته د مسکو پر لور د پرمختګ لارښوونه وکړه.
هغه 'د عدالت لپاره لاریون' په نوم دغه وسله وال خوځښت پرون د جون په ۲۴مه و دراوه او خپلو سرتېرو ته یې امر وکړ چې بېرته خپلو مرکزونو ته ستانه شي.
له دې وروسته کریملین تایید کړه چې له پریګوژین سره یې د بېلاروس په منځګړیتوب د بلوا د پای ته رسېدو هوکړه کړې ده او وې ویل، د اجیرې وسله والې ډلې دغه مشر به بېلاروس ته، چې د روسیې نږدې متحد دی، ولېږدول شي.
د روسیې ولسمشر ولادمیر پوتین پرون په خپلو خبرو کې پریګوژین په خیانت تورن کړ، خو وروسته کریملین وویل، د هغه په وړاندې جنایي قضیه به له منځه ولاړه شي.
کریملین دغه راز ویلي، د واګنر ډلې هغه غړي به نه محاکمه کېږي، چې پرونۍ بلوا او د مسکو په لور مارش کې یې ګډون کړی دی.
تر اوسه معلومه نه ده چې پریګوژین بېلاروس ته تللی او که لا هم په روسیه کې پاتې دی، خو د کریملین ویاند دیمتري پیسکوف ویلي، د روسیې او بېلاروس ولسمشرانو د هغه د خوندیتوب ضمانت کړی دی.
د هوکړې له اعلان څو ساعته وروسته د روستوف والي واسیلي ګولوبیف پر خپل ټلېګرام چینل ولیکل، د واګنر ډلې جنګيالي د کاروانونو په شکل چې ټانکونه او موټر په کې دي، له ښاره د وتلو په حال کې دي او په دښتو کې خپلو مرکزونو ته روان دي.
د پریګوژین جنګیالیو په روستوف کې چې د اوکراین پولې ته دې پروت دی، د یوه لوی پوځي مرکز کنټرول په لاس کې اخیستی و.
تر اوسه معلومه نه ده چې د واګنر ډلې جنګیالي په ځانګړې توګه هغه چې پرونۍ بلوا کې دخیل و، چېرته ځای پر ځای کېږي، خو مشر یې ایفګیني پریګوژین مخکې اعلان کړی چې خپل مرکزونه د روسیې پوځ ته سپاري.
د ریا نووستي په نوم دولتي رسنۍ ویلي چې نن یکشنبه د جون ۲۵مه په روستوف کې د پوځي مرکز شاوخوا سیمې ارامه دي او خلک او موټر بېرته په عادي ډول ښار کې تګ راتګ کوي.
د ټلېګرام په یوه ویډیو کې چې په خپلواکه توګه یې تایید ګران دی، معلومېږي چې روستوف کې د ښاروالۍ یو کارکوونکی سړک جارو کوي او بل لور ته یې موټر روان دي.
په همدې حال کې د روسیې د لویو لارو فدرال ادارې نن یکشنبه سهار پر لارو د اېښودل شویو موانعو د بېرته لرې کولو خبر ورکړی دی.
کارپوهان وایي، اوس که څه هم بلوا او پاڅون پای ته رسېدلی، خو په خبره یې دغه خوځښت د روسیې ځواکمن مشر کمزوری او زیانګالی کړی دی.
په همدې حال کې د اوکراین ولسمشر ولودمیر زیلینسکي ویلي، پرونۍ بلوا وښوده چې د روسیې مشران هېڅ شی نه شي کنترولولی، خو یوازې ګډوډي رامنځته کوي.