یو شمېر افغانان په لویو لارو کې د ډېری رسټورانټونو خواړه صحي نه بولي
بهشته چې د فراه ولایت اوسېدونکې ده وايي، که څه هم پر لویو لارو سفر له امنیتي اړخه ښه شوی، خو دا چې په دې لارو رسټورانټونه چندان صحي خواړه نهلري، دوی ته یې ستونزې پیدا کړي.
بهشتې ازادي راډیو ته وویل، کله چې له فراه تر کابله راځي، نه یوازې دا چې په لویو لارو کې ډېری جوړ شوي رسټورانټونه روغتیايي خواړه نهلري، بلکې په دې لارو کې روغتیايي اسانتیاوې هم نهشته.
بهشته وايي: "د تګراتګ له اړخه لارې ښې شوې، خو چې رسټورانټونه ښه خواړه او پاکې اوبه برابرې کړي، وضعیت ډېر خراب دی. په کومه لویه لاره چې رسټورانټونه ښه او روغتیايي خواړه چمتو کوي، بیې یې لوړې دي چې خلک یې د اخیستلو توان نهلري. له همدې امله خلک هغو رسټورانټونو ته ځي چې بیې یې کمې دي. له بده مرغه دلته بیا کیفیت ډېر ښکته وي."
د بلخ اوسېدونکې رعنا چې دا هم په لویو لارو ډېر تګ راتګ کوي، ورته کیسه کوي.
نوموړې وايي: "د لویو لارو د هوټلونو خواړه پاک نهدي. موږ د سفر پر مهال په کور کې چمتو شوي خواړه له ځان سره وړو، ځکه د رسټورانټونو خواړه د خوړو نهدي. که یې څوک وخوري، ناروغېږي. که ستونزه حل نهشي، همدا وضعیت به روان وي."
د رعنا په خبره، د لویو لارو سفر اوږد وي او انسان خوړو ته اړتیا لري، خو له دې وېرې چې مسموم نهشي، نهشي کولای په هوټلونو او رسټورانټونو کې خواړه وخوري.
د طالبانو حکومت د عامې روغتیا وزارت د محیطي روغتیا ریاست د خوړو د خوندیتوب امر بلال احمد مظلومیار بیا وايي، تر اوسه د ښارونو دننه د هوټلونو او رسټورانټونو د پاکوالي په برخه کې کار شوی او په لویو لارو کې د شته هوټلونو او رسټورانټونو پلان هم شته.
هغه وايي: "د لویو لارو په اړه موږ موضوع مسوولانو سره شریکه کړې چې دا ستونزه هم حل کړي."
د ویلو ده چې د افغانستان په یو شمېر لویو لارو سفر نږدې ۱۸ ساعته هم نیسي چې د اړتیا له مخې باید یو څوک په دومره وخت کې څو ځلي خواړه وخوري.
په لویو کې لارو کې د خوړو د خراب کیفیت په اړه وړاندې هم شکایتونه شوي، خو بیاځلي شکایتونه ښيي، چې د دې ستونزې د حل لپاره هغه ډول چې اړینه ده، ګام نهدی پورته شوی.