حقاني: طالبانو ته باید په جوړېدونکو غونډو کې د ګډون حق ورکړل شي

په افغانستان کې د طالبانو د حکومت د کورنیو چارو سرپرست وزیر سراج‌الدین حقاني د افغانستان لپاره د ملګروملتونو له ځانګړې استازې روزا اوتونبایوا سره په کتنه کې غوښتنه کړې چې په وروستیو څه کم دوه کلونو کې په افغانستان کې امنیت د پام وړ ښه شوی او د اسلامي امارت استازیو ته باید د ملګرو ملتونو له‌خوا په جوړېدونکو غونډو کې د ګډون حق ورکړل شي.


د کورنیو چارو وزارت پرون یکشنبې په خپله ټویټرپاڼه کې په څو ټویټونو کې ویلي چې مېرمن اوتونبایووا هم منلې چې په دې وروستیو کې امینت ډېر ښه شوی او له لیرې سیمو مرکزونوته د خلکو تګ راتګ زیات شوی.


نوموړې همدارنګه ژمنه کړې چې د اختلافاتو سره سره به په مختلفو برخو کې له افغانستان سره مرستو ته دوام ورکړي.


د طالبانو د کورنیو چارو وزارت نه‌دي ویلي چې دغه کتنه کله ترسره شوې او د افغانستان لپاره د ملګرو ملتونو مرستندویه ماموریت یا یوناما هم تر اوسه د دغې کتنې په اړه څه نه‌دي ویلي.