د بریتانيا د پاچا د تاج اېښودنې مراسم ترسره کېږي
پاچا چارلس د تېر سپټمبر په اتمه د خپلې مور او د بریتانیا د پخوانۍ ملکې الیزابیت تر مړینې وروسته د بریتانیا د نوي پاچا په توګه اعلان شو.
تمه ده اوس له میاشتو تیاریو وروسته د هغه د تاج اېښودنې مراسم شنبه د مې په شپږمه ترسره شي.
د ۷۰ کلن چارلس تاج به په شاندارو او مذهبي مراسمو کې اېښودل کېږي.
د شاهي کورنۍ د نویو منصبونو د معرفي رسمي چارې او لوړې به هم سبا کېږي.
برتانوي رسنیو راپور ورکړی چې د نړۍ له ګوټ ګوټ څخه د سلګونو سیاسي شخصیتونو سربېره په زرګونو خلک د برتانوي پاچاهۍ د یوه پخواني او با شکوهه دود د لیدو لپاره د ویسټ مینسټر ایبي او د مرکزي لندن شاوخوا سړکونو کې ورټولېږي.
بکینګهم ماڼۍ که څه هم د مېلمنو دقیق لېست نه خپروي خو راپورونه وايي چې د نړۍ له څه باندې ۲۰۰ هېوادونو د لسګونو جمهور رییسانو او مشرانو ترڅنګ کابو ۲۲۰۰ مېلمانه په دې مراسمو کې ګډون کوي.
چارلس د بریتانیا سربېره د کاناډا، نیوزیلنډ، اسټرالیا په شمول د شاوخوا پنځلسو نورو لویو او وړو هېوادونو پادشاه هم دی.
که څه هم د دغو شانداره مراسمو لپاره ګڼ خلک لېواله دي، خو پر شاهي کورنۍ تل نيوکي وي چې میلیونونه پونډه په دغه شان مراسمو لګوي.