د امريکا په جورجیا کې يو سړي د درې ښځو تر وژلو وروسته خپل ځان وژلی
چارواکي وايي، دغه سړی په دې مشکوک دی، لومړی یې خپله مور او انا د هغوی په کورونو کې وژلي او بیا یې د رستورانټ مدیره ووژله، چې ده پهکې کار کاوه.
د اسوشېټېډپریس اژانس د راپور له مخې، د جورجیا د تحقیقاتو بیرو ویلي، د مک ډانلډ رستورانټ په امنیتي کامرو کې ښکاري چې د کینتاو-یوس وایټ په نوم دغه ۲۶ کلن کس د پنجشنبې سهار د رستورانټ پر مدیرې ډزې کوي.
په انځورونو کې ښکاري، چې وایټ رستورانټ ته دننه کېږي او بیا پر ځان ډزې کوي.
پولیس وايي، مدیره ۴۱ کلنه امیا سمیت وه چې د پولیسو تر رسېدو مخکې یې له وایټ سره یوځای ساه ورکړې وه.
پولیسو د وایټ مور او انا هم موندلي، چې څه باندې ۳ کیلومتره لیرې په خپلو کورونو کې وژل شوې وې.