د ملګرو ملتونو امنيت شورا پر طالبانو غږ وکړ چې پر ښځو لګولي بندیزونه لیرې کړي
رویټرز خبري اژانس ویلي، د امنیت شورا ۱۵ غړو د دیسمبر پر ۲۷مه، په دې تړاو اعلامیه کې لیکلي چې دا بندیزونه د بشري حقونو او انسانانو د بنيادي ازديو ضد دي.
د ملګرو ملتونو انتونيو ګوتېرېش هم له طالبانو غوښتي چې د ښځو او نجونو پر لوړو زده کړو او کار د بندیز پرېکړې لغوه کړي. هغه د دیسمبر پر ۲۸مه، پر ټویټر لیکليچې دا بندیزونه د نه توجیه وړ بشري سرغړونې دي. هغه زیاته کړې د ښځو او نجونو د غلي کولو اقدامات د یوه لوی رنځ او د افغانستان د خلکو د پياوړتیا د لویې ماتې لامل کېږي.
طالبانو د دیسمبر پر شلمه د نجونو لوړې زدهکړې تر دویم اعلان پورې وځنډولې او د همدې اونۍ په پيل کې يې له غیرسرکاريادارو کې د ښځو کار هم منع اعلان کړ.
د افغانستان بشري حقونو په اړه د ملګرو ملتونو ځانګړي څارونکي، ریچرډ بېنیټ د دیسبمبر پر ۲۶مه د هاګ د جرمونو څيړلو له نړيوال عدالته غوښتي وو چې د طالبانو له لوري له ښځو سره د جنسي تبعیض په هکله دې څېړنه وکړي. هغه امريکا غږ راډیو سره په مرکه کې ويلي چې پر ښځو او نجونو د طالبانو له لوري د لګول شویو بندیزونو په اړه د نړیوالو بیانونه او يا هم پر ټويټر خبرې کول کافي نه دي. هغه زیاته کړه چې له همدې امله بايد هاګ نړيوال عدالت دا مسله و ارزوي.
طالبان د ۲۰۲۱ کال د اګست پر ۱۵مه کابل ته ننوتل او پر افغانستان واکمن شول. دوی د خپلې واکمنۍ په پیل کې د نجونو پر مخ تر شپږم ټولګي پورته د ښوونځیو دروازې وتړلې او هغه مهال یې ژمنه کړې وه چې د ۲۰۲۲ز کال په پسرلي کې ښوونځي بیا پرانیزې خو دا کار یې و نه کړ.
طالبانو د نجونو پر تعليم د بندیز سربېره پر ښځو يو لړ نور بندیزونه هم لګولي دي لکه هغوی یې پارکونو ته له تګه هم منع کړي دي، په دفترونو کې د ښځو شمېر کم کړی، له محرم بغیر ورباندې بهر پر تګ راتګ بندیز دی، پر ښځو مخ پټول جبري شوي او پر ټېلېوېژن یې څرګنديدل محدود کړي دي.
افغان ښځو د دې محدودیتونو پرضد د هېواد په بېلابېلو ښارونو کې مظاهرې کړې دي خو طالبان له خپلې تګلارې نه دي اوښتي او نه یې هم د نړيوالو غبرګون ته مثبت ځواب ویلی. د ۲۰۲۲ز کال په جولای کې د طالبانو مشر ملا هبت الله اخونزاده د ديني عالمانو په يوه غونډه کې ويلي ول چې "نه د نړيوالو غوښتنې مني او نه هم ورسره يو قدم مخکې" ځي.