هرات کې یو شمېر ښځینه محصلانو د پوهنتونونو د تړلو په اعتراض لاریون کړی
د هرات پوهنتون یو شمېر نجونو محصلانو د عدالت لپاره غږ پورته کړ او وايي، زدهکړې یې اسلامي او انساني حق دی، خو طالبانو پرې د اور وژونکې اطفایې په وسیله اوبه وشیندلې او اجازه یې ورنه کړه چې مخکې لاړې شي.
د دوی د لاریون ویډیوګانې چې خپله د همدې معترضو محصلانو لهخوا ثبت شوي، د نجونو او ښځو د حقونو د ملاتړو فعالانو په ګروپونو او ټولنیزو رسنیو کې خپرې شوي.
په ویډیوګانو کې ښکاري چې په لاریون کوونکو د طالبانو اطفايې اوبه شیندي او هغوی د اوبو د شدت لهامله په ځمکه لوېږي.
لاریون کوونکې وايي، نن سهار لس بجې یې د مستوفیت له څلور لارې لاریون پیل کړ او غوښتل یې د ولایت تر مقامه ولاړې شي، خو طالبانو یې مخه ونیوله.
د لاریون یوې ګډونوالې شکیبا صدیقي ازادي راډیو ته وویل: "طالبانو زموږ مخه ونیوله او په لرګو، اطفايي، ټوپکو او برقي لرګیو یې زموږ مقابله پیل کړه. ولې بیا هم ودرېدو او ولایت ته نږدې شوي وو. موږ ټولو نجونو (تحصیل زموږ حق دی، تحصیل د ټولو لپاره یا د هېڅ یو کس لپاره، ښځه، تحصیل او ازادي او دقران له رویه، له ښځو د تحصل حق مه اخلئ)) شعارونه ورکول."
یوه بله معترضه محصله چې نه غواړي نوم یې خپور شي، د لاریون له سیمې رسنیو ته استول شوي ویډیويي پیغام کې ویلي: "موږ نن د خپل تحصیل د حق غوښتو لپاره راوتي یوو، هېڅ ډول وسله مو لاس کې نهشته. ولی دوی موږ په دې کوڅه کې بندیانې کړي یوو. پر موږ یې د اطفايي په وسیله اوبه وشیندلې، ټولې نجونې لمدې شوې او په ځمکه ولوېدې."
هاخوا بیا د کندهار د میرویس نیکه پوهنتون یو شمېر محصلانو ازادي راډیو ته وویل، دوی پلان درلود چې نن د طالبانو لهخوا د نجونو پر مخ د پوهنتونونو د تړل کېدو په غبرګون کې لاریون وکړي، خو د طالبانو د ډېرو فشارونو له امله دا لاریون ونه شو.
یوې محصلې چې نه غواړي د امنیتي ستونزو له امله یې نوم په راپور کې یاد شي ازادي راډیو ته وویل: "متاسفانه د امنیتي ځواکونو له ډېر بد چلند سره مخامخ شوو. موږ ته ځینو کسانو مسجونه کړي، زنګونه یې وهلي، زموږ د ټیم کسانو ته د مرګ ګواښ کړی. پوهنتونونو کې یې هم ویلي، که څوک لاریون وکړي، له دندې ګوښه کېږي او قانوني چلند ورسره کېږي."
یوه بل محصل هم چې نه غواړي نوم او غږ یې راپور کې خپور شي ازادي راډیو ته وویل، طالبانو د پوهنتون تر مخه ۵۰۰ مټرۍ کې سخت امنیتي تدابیر نیولي وو او تر خوا یې د دوی کلکه څارنه کوله.
د کندهار د میرویس نیکه یوې بلې محصلې هم د خپل نوم د نه خپرولو په شرط ازادي راډیو سره خبرو کې طالبان تورن کړل چې د لاریون کوونکو په لیکو کې یې نفوذ کړی و او قصداً یې غوښتل ګډوډي جوړه کړي چې له همدې امله ډېرو لاریون کوونکو له لاریون لاس واخیست.
هغه وویل: "زموږ بنسټیزه غوښتنه دا وه چې په سولهییز ډول خپل غږ پورته کړو، نه دا چې ګډوډي جوړه کړه. د بیان ازادۍ هغه حق چې اسلام ښځو ته ورکړی، غوښتل مو هغه پلی کړو او مخکې ولاړ شو. خو متاسفانه دوی زموږ په هر ګروپ کې خپل یو جاسوس اډ کړی و."
خو د طالبانو د والي ویاند حاجي زید بیا دا ادعاوې رد کړې.
هغه ازادي راډیو ته وویل، کندهار کې هېڅ لاریون نهدی شوی او ټول کندهار کې ارامي ده.
د پوهنتونونو د تړل کېدو په غبرګون کې تر اوسه په ننګرهار، کابل، تخار، کندهار او هرات کې لاریونونه شوي.
تر خوا یې پرون په کوټه کې او هند کې هم د نجونو د پوهنتونونو د تړل کېدو په غبرګون کې لاریونونه شوي او د طالبانو دا پرېکړه په سختو ټکو غندل شوې ده.