د غبرګونونو دوام؛ د کرکټ ځینو لوبغاړو زده کړه د ښځو اساسي، حیاتي، اړین او اسلامي حق بولي
د افغان کرکټ ملي لوبډلې پیاوړی لوبغاړی محمدنبي د ښځو زده کړې یوه حیاتي اړتیا بولي او وايي، زده کړې د افغانانو روښانه راتلونکی تضمینوي.
هغه پر خپل فېسبوک پاڼه لیکلي: "مونږ ټول باید دا ومنو چې زمونږ ټولنه او دغه هېواد د مېرمنو زده کړو ته هم حیاتي ضرورت لري. ځکه چې د دواړو نارینه او ښځینه وو په زده کړو او ګډو هڅو د هېواد او ملت روښانه راتلونکې تضمینېږي."
د افغانستان د کرکټ لوبغاړي راشدخان پر خپل فېسبوک پاڼه بیا یو حدیث خپور کړی چې د علم ترلاسه کول پر هر مسلمان فرض بلل شوي.
هغه وايي، د نالوستې ښځې په غېږ کې روزنه د ټولنې لپاره ګټور نه شي تمامېدای.
هغه ویلي: "په دې کې شک نه شته چې ښځه د ټولنې نيمه برخه ده او دا هم منلې خبره ده چې ښځه د انساني ټولنې بنسټ دی، دا په دې چې ښځه هم مور ده، هم مېرمن ده، هم خور ده، هم لور ده او په ټوله کي د توکمونو (نسلونو) روزونکې او پالونکې ده. دا هغه لومړنۍ مدرسه ده چي د انسان شخصيت په کې وده کوي او جوړښت مومي. نو کومه ټولنه چي خپل کوچنيان د جاهلې او نالوستې ښځې په غېږ کې پرېږدي، ورته ممکنه نه ده چې له خپلو غړو دې د سم او ګتور خدمت او هلو ځلو تمه ولري."
دغه راز د افغانستان د کرکټ ملي لوبډلې یو بل لوبغاړی رحمان الله ګربز د راشدخان په څېر د یو حدیث په خپرولو سره وايي چې زده کړه پر هر مسلمان فرض دی او په خبره یې یوه باسواده کورنۍ ټولنې ته خوشالي ورکوي او دغه راز د هېواد د پرمختګ لامل کېږي.
هغه وویل: "يو باسواده کورنۍ ټولنې ته خوشالي ورکولای شي او د هېواد د ترقۍ سبب ګرځي او ناپوهه ټولنه تل پر ټولنې بوج وي."
د طالبانو دغه اقدام ته په کور دننه او بهر تند غبرګونونه ښودل شوي.
په افغانستان کې د ملګرو ملتونو سازمان د یوې اعلامیې په خپرولو سره ویلي چې د طالبانو دا پرېکړه غندي چې پوهنتونونو ته د ښځو ورتګ ځنډوي.
دغه سازمان له طالبانو غواړي چې ژر تر ژره دې له دې پرېکړې په شا شي.
اخوا د ننګرهار پوهنتون د طب پوهنځي محصلانو د طالبانو د لوړ زده کړو وزارت د وروستۍ پرېکړې پر خلاف لاریون وکړ او له طالبانو یې وغوښتل څو دغه پرېکړه بېرته واخلي.
د افغانستان د بېلابېلو پوهنتونونو یو شمېر ښځینه محصلانو له ازادي راډیو سره په خبرو کې د طالبانو پر پرېکړه خواشیني وښوده او وې ویل چې هیله لري دوی بېرته خپلې زده کړې پیل او په دې سره خپلو هیلو او ارمانونو ته ورسېږي.
د طالبانو لوړو زدهکړو وزارت د یوه تازه فرمان پر اساس تر امر ثاني پورې د افغان نجونو پر هر ډول زدهکړو بنديز ولګاوه.