د افغانانو په ګډون نړۍ کې ۷۰ سلنه کډوال د اقلیم بدلون له امله دي
د کډوالو لپاره د ملګرو ملتو عالي کمېشنر فیلیپو ګراندي د اقلیمي تغییراتو په اړه د ملګرو ملتونو ۲۷مې غونډې ته وویل چې په میلیونونو بېځایه شوي د بدل شوي اقلیم ستونزو ته نه شي پرېښودلی.
د کډوالۍ نړیوال سازمان د سږکال په پیل کې ویلي و چې په افغانستان کې نږدې شپږ میلیونه کسان په کور دننه بېځایه شوې دي.
د ملګرو ملتو عمومي منشي انټونیو ګوټرش پرون د اقلیمي بدلون په اړه د ملګرو ملتونو ۲۷مې ناستې ته د وینا پرمهال ټولې نړۍ ته خبرداری ورکړ.
ګوټرش وویل: "ساعت په تېرېدو دی. موږ د خپل ژوند په جګړه بوخت یوو او له ماتې سره مخامخ یوو. ګلتوني ګازونه په زیاتېدو دي. د ځمکې کره په ګرمېدو ده او زموږ سیاره په چټکۍ د اوج هغه ټکي ته ورنږدې کېږي چې د اقلیم د بحران مخه بیا نه راګرځي. موږ په هغه لویه لاره روان یو چې د اقلیم دوزخ ته په خپلو پښو ورځو او سرعت پسې زیاتوو"
د مصر په شرم الشیخ کې د اقلیمي بدلون غونډه د یکشنبې په ورځ پیل شوه چې د راتلونکې اوونۍ تر اخره دوام کوي.
د ملګرو ملتونو په وینا د اقلیمي بدلون د اغېزو له مخې افغانستان د نړۍ شپږم زیانمن هېواد دی.
د طالبانو د حکومت د بهرنیو چارو وزارت ویاند عبدالقهار بلخي په خپل ټوېټر کې لیکلي دي چې روان کال د اقلیمي تغیراتو له امله افغانستان ته څه باندې دوه میلیارد ډالر زیان رسېدلی دی.
دا په داسې حال کې ده چې په افغانستان کې د ملګرو ملتونو د بشري مرستو د همغږۍ دفتر یا اوچا مرستیال رامز الا کبروف وايي، افغانان د اقلیم د ویجاړونکو اټکلونو پر څنډه ولاړ دي او د افغانستان اوسنۍ اداره دې دغه ګواښونه جدي ونیسي.