د کور پر کور تالاشي او غبرګونونه؛ طالبانو کندهار کې ښځينه پوليسې پر دندو ګمارلي
د روانې اوونۍ د یکشنبې په ورځ طالبانو د هلمند په مرکز لښکرګاه کې د کورونو د تالاشۍ پر مهال د یوې کورنۍ له غړو سره تر لفظي شخړې وروسته پر هغوی ډزې وکړې چې له امله يې دوه مېرمنې ووژل شوي او د دوه ماشومانو په ګډون شپږ کسان ټپیان شول.
د کندهار یو شمېر اوسېدونکي ادعا کوي چې په دې ولایت کې طالب ځواکونه د کور په کور تالاشیو پر مهال له خلکو سره ناسم چلند کوي.
د دې ولایت ګڼو اوسېدونکو پر ټولنیزو رسنیو فېسبوک او ټویټر لیکلي دي، چې د پلټنو پر مهال له طالب ځواکونو سره د ښځینه پولیسو نه موجودیت او دغه شان د طالبانو ناسم چلند ګڼې ستونزې را پیدا کړي دي.
د کندهار یوه اوسېدونکي چې نه يې غوښتل نوم يې په راپور کې خپور شي ازادي راډيو ته وویل: "کومې تالاشیاني چې اوس مهال طالبانو په کندهار کې پیل کړي دي، دوی په کورونو کې په خپل سر ننوځي او ښځینه کارمندانې هم ورسره نه وي، خلکو ته کالي او د کور وسایل ګډ وډوي، دې کار خلکو ته ګڼې ستونزې پیدا کړي دي، داسې چې کله دوی ځي وروسته بله ډله راځي هغوی طالبان نه وي بلکې غله وي ځکه نه معلومیږي نه رسمي یونیفورم شته او نه له دوی سره کوم رسمي کارت."
د کندهار یو شمېر نورو اوسېدونکو بیا په ټولنیزو رسنیو فېسبوک او ټويټر کې ادعاوې کړي او لیکلي يې دي، د هغه څه په اړه چې په تېرو شلو کلونو کې يې په اړه طالبانو انتقادونه کول او ویل چې بهرني ځواکونه د افغانانو کورونو ته ورځې اوس دغه چاره طالبان پخپله کوي، چې په وړاندې يې د خلکو کرکه زیاتیږي.
دوی د تالاشیو پر مهال د ښځینه پولیسو موجودیت اړین بللی او له خلکو سره يې د طالب ځواکونو پر سم چلند ټینګار کړی دی.
د طالبانو حکومت د کورنیو چارو وزارت ویاند عبدالنافع ټکور د دې راپور تر خپرېدو پورې د دغو ادعا ګانو په اړه زمونږ پوښتنه ځواب نهکړه.
خو د کندهار د ولایتي ادارې له لوري په خپرو شویو ویډيو ګانو او انځورونو کې ښکاري چې طالب ځواکونه د کور په کور تالاشۍ پر مهال چې ښځینه پولیسې هم ورسره شته، له خلکو سره ښه چلند کوي او خلک هم ظاهرا په دې ویډيو ګانو کې د طالبانو له چلنده خوښ دي.
دا په داسې حال کې ده چې همدا روانه اوونۍ د یکشنبې په ورځ د کندهار په ګاونډ هلمند ولایت کې طالب ځواکونو د کورونو د تالاشۍ پر مهال د یوې کورنۍ له غړو سره تر لفظي شخړې وروسته پر هغوی ډزې وکړې چې له امله يې دوه مېرمنې ووژل شوې او د دوه ماشومانو په ګډون شپږ کسان ټپیان شول.
د طالبانو حکومت د کورنیو چارو وزارت په دې اړه وايي، په هلمند کې يې د هغه پېښې په اړه څېړنې پیل کړي، چې له امله يې د طالب ځواکونو په ډزو کې دوه مېرمنې وژل شوي دي.
د دې وزارت ویاند عبدالنافع ټکور ازادي راډيو ته وویل: "چا چې دا ډزې کړي او ستونزه يې پېښه کړې هغه نیول شوي او دې موضوع ته پلاوی هم ټاکل شوی دی د بېلابېلو ارګانونو نه چې کله څېړنې پای ته ورسېدې تاسې سره به يې په اړه معلومات شریک کړو."
د تېر جمهوري نظام د بشر حقونو ریسې شهرزاد اکبر پر خپل ټویټر لیکلي دي، په هلمند او کندهار کې د کور په کور تلاشيو پر مهال له خلکو سره د طالب وسله والو ناسم چلند او د دوه مېرمنو وژل کېدل ویرونکي او د اندېښنې وړ خبره ده.
د زیانمنې شوې کورنۍ غړي په دې اړه څه نه وايي خو خود سیمې يو اوسېدونکی چې نه يې غوښتل نوم خپور شي ازادي رادیو ته وویل: "دوه مېرمنې شهیدانې شوي، یوه د ملک اخلاص مور ده یوه يې کور والا ده، ولا یو بد حالت دی، سړی به څه ووايي، داسې تالاشي ما ولاکه کله لیدلې وه."
دغه راز د سيمې يو بل اوسېدونکی هم چې نهغواړي نوم واخيستل شي وويل: "دا په هلمند کې پېښه شوې ده، د ملک اخلاص په کور کې د تالاشۍ پر مهال طالبانو په خلکو ډزې کړې دي او دا پېښه رامنځته شوې ده."
که څه هم د طالبانو حکومت په کندهار او هلمند کې د کور په کور تالاشیو د لامل په اړه څه نهدي ویلي، خو له دې وړاندې يې د کابل په ګډون په ډېری ولایتونو کې کور په کور تلاشيو ته د تصفیوي عملیاتو نوم ورکړی و.
دا په داسې حال کې ده چې پر افغانستان د طالبانو له دوهم ځل واکمنۍ را وروسته چې څه د پاسه یو کال ترې تېریږي، د نجونو په وړاندې له شپږمو ټولګیو پورته د ښوونځيو دروازې تړلي دي او مېرمنې کار ته نه پرېښودل کېږي.
هغه زرګونه مېرمنې چې د تېر جمهوري نظام پر مهال يې په پولیسو کې دندې درلودې ډېرې يې بېکاره شوي او اوس مهال په کورونو ناستې دي.